Nunatsinni meeqqat piitsut

Meeqqat inuusuttullu pillugit Ilisimasaqarfiup, MIPI-p Kalaallit Nunaanni meeqqat piitsuussusaat pillugu nalunaarusiaq ataasinngormat saqqummiuppaat, misissuineq tassaavoq illoqutigiit meerallit isertitaat tunngavigalugit kisitsisinngorlugit misissueqqissaarineq.

Nalunaarusiap takutinniarneqarpoq piitsuussusermut uuttuutit assigiinngitsut pingasut tunngavigalugit Kalaallit Nunaanni meeqqat piitsuussusiata qanoq annertutiginera takutinniarneqarpoq, nalunaarusiami takuneqarsinnaavoq:

1. Kalaallit Nunaanni meeqqat tamarmiusut 9 %-tii - aqqaniliugaangata ataaseq - isertitat qanoq agguataarnerat aallaavigissagaanni piitsuusoq. Uuttuut taanna nunat tamat akornanni uuttuinermi atortarpoq, tassa inuiaqatigiinni pineqartuni isertitat qanoq agguataarsimanerat aallaaviginedqartarpoq, taannalu tunngavigalugu piitsuussutsip taassuma killinga uuttorneqartarpoq.

2. Kalaallit Nunaanni meeqqat tamarmiusut 39 %-tii - pingasuugaangata ataaseq - illoqutigiinni pisariaqavissumik ikiorsiissutinik pisartagalinniittuusoq. Taamatut piitsuussuseq uuttorneqartarpoq inoqutigiinni meeqqat ilaaffigisaani arlaat ukiup ingerlanerani pisariaqavissumik peqquteqarluni ikiorsiissutinik pisartagaqarsimasoq - tassa aningaasatigut ikiorsiissutinik.

3. Kalaallit Nunaanni meqqat tarmarmiusut 4 %-tii - 25-iuppata ataaseq - pisortanit pisartagalinnit appasinnerusumik isertitallit meeraasoq. Uuttuinermi najoqqutarineqarpoq, meeraq illoqutigiinni pisortanit pisartagalinnit (akigititat assigiinngitsut aalajangersimasut aallaavigalugit) appasinnerumik isertitalinni inuusoq.

Nalunaarusiami aamma takutinneqarpoq illoqutigiinni imatut inissisimasoqartillugu piitsuussuseq takussaanerusartoq:

- Illoqutigiit inersimasortaat 25-it ataallugit ukioqaraangata

- Illoqutigiinni inersimasoq pilersuisoq kisermaajugaangat

- Illoqutigiinni meerarpassuugaangata

- Illoqutigiit nunaqarfimmiuugaangata

- Illoqutigiit inersimasortaat tamarmik Kalaallit Nunaanni inunngorsimagaangata

Paasisat taaneqareersut saniatigut nalunaarusiami aamma Kalaallit Nunaanni kommunini meeqqat piitsuussusaat sanilliunneqarsimasut takuneqarsinnaavoq, aammalu nunani assigiinngitsuni meeqqat piitsuussusiannut sanilliussinerit.