Aktianik nioqquteqarneq naammassilerpoq

Nordatlantisk Venture A/S-imi aktianik nioqquteqartitsineq maanna naammassingajalerpoq.

– Anguniagaraarput Kalaallit Nunaanni namminersortut sapinngisamik amerlanerpaat kalaallit piginneqatigiiffiinik ineriartornissamut periarfissagissaatunik piginneqataalersinnaanissaat, aammalu ilaatigut illuliortiternerup iluani suliniutini ataasiakkaani nutaani, piginneqatigiiffiup pisortaa Svend Lyse oqarpoq.

Nordatlantisk Venture A/Sip piffissami septembarip pingajuaniit 21ata tungaanut aktiat 50.000t tuniniassavai, taakku aktiat aningaasanik nioqquteqartarfimmi Dansk Autoriseret Markedspladsimi nioqqutigineqalissapput, ulloq niuerfik siulleq tassaassalluni septembarip 28at.

Aktiat nutaat nalingat 150-imut inissinneqarsimavoq, taamaalilluni aktienik niuerneq taanna 7,5 millioner kroninik isertitsissutaassaaq, aningaasat taakku piginneqatigiiffiup suliniutinut nutaanut atorumaagassai.

Aktianik nioqquteqarneq namminersortunut assigiinngitsunut sapinngisamik amerlanerpaanut anngussinnaajumallugu aktiat ikinnerpaamik 100t pisiarineqarsinnaasunngortinneqarsimapput, aktiallu ataatsip nalinga 150iummat taakku 15.000 kroneqassapput.

Nordatlantiske Venture A/S Grølandsbankimut kajuminnartumik aningaasalersuisinnaanermut isumaqatigiissuteqarsimavoq. Grølandsbanki atuisartunut aktianut nutaanut taakkununnga aningaasaleerusuttunut 50.000 kr. tikillugit atukkuusinnaavoq.

Atukkat uninngasuussasut pineqarput, tassa aktionærit taamaallaat erniat ingerlaavartut akilertassallugit. Peqatigitillugu fondsmæglerselskabet OTC qularnaveeqqutiivoq, aktiat naleqqortussutsimut 150imut nalilerlugit ukiuini tulliuttuni tallimani utertillugit pisiarisarniarlugit.

– Taamaalilluni Nordatlantisk Venture A/Simi aktianik pisinermut atatillugu ukiiuni tallimani tulliuttuni ernumanartoqassanngilaq, Sven Lyse oqarpoq.

Kalaallit Nunaanni aningaasatigut ineriartorfiusumi, ilaatigut aatsitassarsiorneq aluminiumiliornissarlu eqqarsaatigalugit, aammalu piginneqatigiiffiit pioreersut pisortanit pigineqartut namminersortunngorsarneqarnissaanerannut oqartussaasut ammasumik isumaqarnerat iluatsillugu Nordatlatisk Venture A/S-ip piginneqatigiiffinnut pioreersunut aningaasaliinissamut periarfissanik annertuunik takorluuipput, suliniutissanillu nutaanik aallartitsinissamut.

– Peqatigitillugu Kalaallit Nunaanni aktianut tunngatillugu kulturimik ineriartortitsinissaq kissaatigaarput; inuinnaat aktiaataannik taallugit, kalaallit innuttaasut taamaalillutik nunap nammineq suliffeqarfiutaannut piginneqataalersinnaalissammata, Sven lyse oqarpoq.