Marø: Meeqqat pillugit nalunaarusiaq nalorninartortaqarpoq
Kulturimut Ilinniartitaanermullu Naalakkersuisoq Tommy Marø (Siumut) Ilaqutariinnermut aamma naalakkersuisuusoq MIPI-p meeqqat piituussusiannik nalunaarusiaata inernera imaaliallaannaq akueriumanngilaa.
- Kalaallit Nunaanni meeqqat piitsuussusiat pillugu MIPI'p nalunaarusiaa kingulleq soqutiginarpoq atuarlugulu aarleritsannarluni. Nalunaarusiaq Naalakkersuisunit massakkorpiaq atuaqqissaarneqarpoq sulisunillu immikkut paasisimasalinnit sulianik taamaattunik kisitsisinik naatsorsoqqissaakkanik ilalinnik sungiussisimasunit nalilersorneqassalluni, Tommy Marø allappoq.
- Piitsuususeq pillugu nassuiaatit pingasuusut nalunaarusiami naleqqiunneqarnerat uparuarneqarsinnaavoq nassuiaatillu taakku pingasuusut piitsuussuseq pillugu uuttuutitut nunanit tamalaanit akuerisaasutut taaneqarput. Piitsuussuseq allamut naleqqiussaq aammalu piitsuussusertut paasineqartoq kisimik nunani tamalaani akuerisaallutik uuttuutaasarput, piitsuussuseq pisariaqavissuinnarnut ikiorsiinertalik uuttuutaavoq sumut tunngatinneqarsinnaanera oqaluuserineqarsinnaasoq, taannali Kalaallit Nunaanni pissutsinut atugassatut naleqqussagaavoq. Piitsuussusermut pisariaqavissuinnarnut ikiorsiineq pillugu nassuiaatigineqartoq nalunaarusiami tamanut tunngatillugu annikippallaamik uparuarneqarpoq amerlanertigullu piitsuussutsinut nassuiaatinut allanut naleqqiunneqartarluni.
Pisariaqavissuinnarnut ikiorsiissutit tunngavigalugit piitsuussusermut nassuiaatigineqartoq ilaatigut paasiuminaappoq pissutigalugu inuit pisortaniit ikiorserneqarsimasut tamarmik tassani ilanngunneqarmata aningaasaqarnerallu uparuartorneqarluni. Tamatigut imaaginnartanngilaq inuk kinaluunniit pisortanit ikiorserneqarsimasoq ataavartumik aningaasatigut ajornartorsiuteqartartoq inoqutigiinni meeqqanut kingunerlussutaasartumik. Inuit ilaat pisariaqavissuinnarnut ikiorserneqarsimasut immaqa imaalillugit agguarnilerneqartariaqarput aningaasatigut pisariaqavissuinnarnut ataavartumik ikiorserneqartartunut aammalu aningaasatigut pisariaqavissuinnarnik ikiorserneqarallartunut, Tommy Marø allappoq.
Naalakkersuisut nalunaarusiap immikkut sulialinnit immikkullu paasisimasalinnit nalilersorneqarnissaa utaqqimaarpaat, pissutsit taama ajortigisut atorlugit meeqqat inuuneqartut pitsaanerusumik inuuneqalersinnissaannut suliniuteqarnissamut atorneqarsinnaaniassammat.