Kinguaariinnut nutaanut isumassarsisitsisutut
Anaanaq panialu, Isaksenikkunnit iluatsitsilluartunit Isaksen Design-imeersut, isumaqarput kalaallisut kingornussatik atisanik sammisaqarnermi iluaqutaasinnaasut.
Nickie, 33-inik ukiulik, aamma Rita, 54-inik ukiulik, oqarput kalaaliussusertik pilersaarusiornerminni atunngisaannarsimallugu, paasinarsisimavorli tamanna atisanik sammisaqartuni iluaqutaalluarsimasoq. Isaksen Designip atisaliai ullumi nunarsuarmi pisiniarfissuit nuimanersaasa ilaanni, New Yorkimi 5th Avenue-mi Takshimaya-mi, nunarsuarmilu tamarmi pisiniarfinni allani 24-ini, tuniniarneqarput.Tamatuma saniatigut meqqiat sapaatip akunnerani uani Kunngissakkunnit New Yorkimi nittarsaanneqarpoq, qallunaat ilusilersugaasa Creative Nation-imik taallugu nittarsaanneqarneranni.
- Tamarmik isumaqarput Kalaallit Nunaanneersuugatta allanartorujussuusoq, New Yorkimi 2nd Avenue-mi Det Danske Generalkonsulatimi kaffisoqatigalugu Nickie oqaluttuarpoq.
Andrew Mandell, Takashimaya-mi pisiortortartuusoq, ukioq mannalu Isaksen Designimik nassaarsimasoq, isumaqataavoq.
- Pisisartutta ikinngutitik arnat nereqatigalugit nuannarilluinnarpaat oqaluttuutissallugit tuluujuk pisiareqqammigartik Kalaallit Nunaanneersuusoq, Mandell oqarpoq.
Nickie aamma Rita Kalaallit Nunannit Danmarkimut nuupput ukiut 28-it matuma siornatigut, oqarpullu uternissaminnut qaqutiguinnaq akissaqarlutillu piffissaqartarlutik. Nickie affarmik kalaaliuvoq, kalaallisulli oqalussinnaanani, Ritallu inunnguuseralugu oqaatsini qaqutiguinnaq atortarpa. Taamaakkaluartoq kalaallisut kingornussatik isumassarsiatillu ilusilersuinerminni atugarilluarlugit oqarput.
- Ilusilersukkavut nunamit angerlarsimaffigisatsinnit sunnerneqartorujussuusimapput, Nickie oqaluttuarpoq, ilisserinermi qalipaataasigullu. Taavalu atorsinnaalluarput kusanartuullutillu. Kalaallit Nunaanni kusanartoorusupput, atisalli aamma atorneqarsinnaassapput.
Rita mersortartutut pequtinillu kiffiaasartutut ilinniagaqarsimavoq, Nickielu London College of Fashion-imit atisanik ilusilersuisartutut ilinniagaqarsimalluni. Tamatigut suleqatigiinnissartik sinnattorisarsimavaat, 2002-milu aallartipput, Københavnimullu nuullutik Isaksen Design aallartillugu.
Ullumikkut aamma pequsiortalersimapput taamatut meqqilinnik, tamakkualu sananeqartarput Ritap uianit Lars Isaksenimit, 51-inik ukiuik, Nickiellu aappaanit Larsi Sørensenimit, 32-inik ukiulik, taannalu nunatsinni hip hop-ertartuni Nuuk Posse-mi nipilersoqataasarsimavoq.
Kalaallinit kingornussaat aporfiunngisaannarsimapput, taamatut isumaqarpoq Nickie.
- Oqaluuserineqakulasarpoq affarmik kalaallit imminnut napatinnissaminnut ajornakusoortitsisartut, tamannali malugisimanngivippara. Akerlianik.
Iluatsitsilluarnerlu akisussaassuseqartitsivoq, Rita isumaqarpoq.
- Nalunngilluinnarparput kinguaariinnut nutaanut maligassiortitsisugut, taanna oqarpoq.
Marlunngornerup unnukkua anaanamut panianullu unnuk angisuujuvoq. Atisaarniarfissuaq Takashimaya qallunaat nioqqutissanik ilusilersugaannik takutitsilluni ammaanersiornermi ilassinnippoq, Isaksen Designilu tamatumani erseqqissaatigineqarpoq, kunngissakkullu ataqqinaammik qaaqqusaapput.
- Frederik isimippoq kalaalerpalussusai ilisarigamigit, Nickie oqarpoq. Kalaallit Nunaannummi immikkut illuinnartumik attaveqarpoq.