1200-ngajaat ilinniarniarlutik qinnuteqarput

Sulisoqarnermut Inuutissarsiutinullu Ilinniartitaanermut Pisortaqarfiup 2007-imi ilinnialerniarlutik qinnuteqartut pillugit misissuinera naapertorlugu 1.188-it ilinnialerniarlutik qinnuteqarsimapput, knr.gl allappoq.

Suli anguterpassuit ilinniakkanut "ippannartunut" qinnuteqarumasarput.

Misissuinerup ersersippaa qinnuteqartut 51 procentii arnaasut. Mississuineruttaaq ersersippaa qinnuteqartut 14 procentiinnaat nunaqarfinneersuusut.

Arnat allafissornerup iluani ilinniagaqalernissartik pilerigineruaat, tassa 237-it allaffimmiunngorniarlutik qinnuteqaramik. Pilerigineqarnerit tulleraat inulerinermik ilinniagaqarneq. Kiisalu qarasaasiaq atorlugu ilusilersuisartutut, grafikeritut, ilinnialerusullutik arnat marluinaat qinnuteqarput.

Angutit ilinnialerniarlutik qinnuteqaateqartut akornanni Saviminilerinermik Ilinniarfik pilerigineqarnersaavoq, tassa 360-it tassunga qinnuteqaramik, angutit marluinnaat peqqinnissamut tunngasunik ilinniagaqarniarlutik qinnuteqartut.

Powered by Labrador CMS