Eskimo Pels matussaaq
Nunatta ammeriviisa pisoqaanersaat novembarimi matussaaq.
Eskimo Pels novembarip aallaqqaataani matussaaq. Suliffeqarfiup pisortaa Hanne Hartvig uppernaasaalluni Sermitsiaq.gl.-mut taama ilisimatitsivoq. Piginnittut marluusut tassaapput Hanne Hartvig aamma Ingvar Rohde. Suliffeqarfik ukiunik 35-nik pisoqaassuseqartoq matuppat sulisut tallimat soraarsinneqassapput.
Eskimo Pelsimi pisortat piginnittorlu ilisimatitsipput Narsap kommuniata Mestervejimi eqqaakkanut aqqusinniornissamik piumassuseqannginnera qisuarsimannginneralu matusinissamut aalangernermut pissutaasoq. Sullivinnik Nakkutilliisoqarfiup pinngitsuunngivilluni anartarfiit eqqagaasa aqqutissaanik imermullu attavilerneqarnissa angali piumasarisimagaluarpaa.
Sullivinnik Nakkutillisoqarfiup suliffeqarfimmik matuseqqunissaa piumanagu suliffeqarfik Eskimo Pelsip piginnuttuata novembarimi matuinnarnialerpaa.
- Kommunip eqqakkanut aqqutissaq akilissallugu neriorsuivoq, tamannali pinngisaannarpoq, Ingvar Rohde Sermitsiaq.gl.-mut oqarpoq. Nammineerluni akileerusunngilaq isumaqarluni kommunip neriorsuunni piviusunngortittariaqaraa.
Ingvar Rohdep Narsap Kommuneanut suliffeqarfiutini neqeroorutigisimavaa, naapertorlugili kommune suli akissuteqarsimanngilaq. Ingvar Rohde inuttut matusinissaq attorneqaatiginngilaa tikkuarluguli kommuni takornariartartunik sulisunillu tallimanit akileraarutitigut iseritataqartartunik annaasaqassammat.
Hanne Hartvig oqarpoq Narsap Kommunea takornariartartunik sulisut tallimat akileraarutigisartagaannik annaasaqassasoq. Hanne Hartvig naapertorlugu kommunip akileraarutikkut A-kut kommune 450.000 koruuninik isertitaqartartoq. Suliffeqarfik akiliisinnaajunnaarluni 2005-mi matuvoq 2006-mi ammaqqilluni, tassappullu isertertitat ammaqqinneranit pineqartartut.
Suliffeqarfik 2005-mi akiliisinnaajunnarpoq. Ingvar Rohdep Jim Pedersenilu akilisinnajunnarsimasoq ammarpaat. Hanne Hartvig nunatsinni Danmarkimi ukiorpassuarni ammerilersartoq misilittagartoorlu pisortanngortinneqarpoq ulluinnarnilu aqutsisunngorluni. Hanne Hartvig Great Greenlandimi tunisassiornermut 1980-ikkut pisortaavoq.