Arfernik kisitsinerit annersaat naammassineqartoq
Arfernik kisitsinerit oqaluttuarisaanermi annersaat naammassineqarsimalerpoq. Pinermi ataatsimi imartaq taama annertutigisoq aatsaat kisitsiffigineqarpoq.
NAMMCO peqatigalugu arfernik kisitsisoqarpoq T-NASS-imillu taaguuserneqarsimalluni, tassanilu peqataapput kitaanit Canada kangianillu Rusland, Pinngortitaleriffik nalunaaruteqarpoq.
Nunarput T-NASS-imut peqataavoq umiarsuarmillu timmisartumiillu Pinngortitaleriffimmeersut kisitseqataallutik. Marloriarluni kisitsinermi tikaagulliusaat, tikaagulliusaarnat, tikaagulliit qipoqqaallu takuneqarput. Aammattaaq arferit mikinerusut takuneqarput soorlu niisat, aarluarsuit, niisarnat anarnat puisillu assigiinngitsut. Misissuinerup inerneri maanna suliarineqassapput aappaagulu NAMMCO-p IWC-llu ataatsimiinneranni saqqummiunneqassapput nungusaataanngitsumillu piniarnermut innersuutaasussanut tunngavissaassallutik.
Pinngortitaleriffiup Imarsiornermik Nakkutilliisoqarfik nakkutilliissummik Tulugaq-mik inuttaanillu atukkiisoq suleqatigaa. Umiarsuarmit kisitsineq kisitsisussanik sisamanik Pinngortitaleriffimmeersunik ilalerluni ingerlanneqarmat Nuup Kommuneanit Qeqertarsuup tunuata tungaanut kisitsivigineqarpoq, tamannalu junip 27-iannit julip 19-iata tungaanu pilluni.
Augustip 27-annit septemberip 29-iata tungaanut timmisartumit Nunap Isuanit Uummannap tungaanut kisitsisoqarpoq. Tassani timmisartoq Twin Otter qaarajuttunik igalaalik atorneqarpoq kisitseqataasullu sisamaallutik. Kisitsinerni taakkunani silarluk pujorneralu ajornartorsiutaagaluartut sinerissap annersaa kisitsivigineqarpoq.