KNR-ip naammassisaqarnissamut isumaqatigiissut taamaatippaa
Digitaliseriinermit akiitsut millionilikkuutaat KNR ajornartorsiortippaa isumaqatigiissutillu tunngavii allanngortillugit, KNR-imi aqutsisut isumaqarput.
KNR-ip siulersuisuisa aqutsisuisalu naammassisaqarnissamut Naalakkersuisullu isumaqatigiissutertik taamaatippaat. Radioqarfiup aqutsisuisa isumaqatigiissut nutaamik isumaqatigiinniutigerusuppaat aqutsisummi isaannit isigalugu aningaasaliissutini malunnaatilimmik allanngortoqarsimavoq.
Digitaliseeriinissaq aningaasalersorniarlugu KNR 25 mio. kroninik attartortariaqarsimavoq taamaalillunilu ukiut qulit tulliuttut KNR-ip aningaasaqarnera artukkertussanngorlugu. Taamaammat KNR-ip aallakaatitassiornini annikillisittariaqalerpaa. Aqutsisulli siulersuisullu allatut siunnersuuteqarput, tassa 25 mio. kronit taakku akilerarneqarnerani KNR-i landskarsimit anginerusumik tapiiffigineqartalissasoq.
Ukiumi aningaasaqarfiusumi 2008-mi naalakkersuisut 57 mio. kroningajannik KNR-mut aningaasaliissuteqarput. Taakku 2007-imut naleqqiullugit 1,1 mio. kronimik anginerupput.
KNR-imi siulersuisut siulittaasuata Juaaka Lyberth-ip aamma pisortap Lars Lennert-Sandgreenip isumaqatigiissutissap ukiap ingerlanerani isumaqatiginniutigisinnaanerarpaat januarip aallaqqaataani 2008-mi atuutilersinnaaniassammat.