Timmisartumut ilaasut suli utaqqipput
Timmisartumi sulisut aamma Air Greenland imminnut assut ungasipput. Air Greenlandip manna suli naluaa suliumajunnaarnerup ilaasunik qassinik eqquiumaarnissaa.
– Aammaarlunga timmisartumi inuttat sulileqqeqqullugit qinnuigisimavakka. Kisianni pissutsit massakkorpiaq imaapput, illuatungeriit imminnut assut ungasillutik taamalu suliumajunnaarneq ingerlaannassaaq, timmisartuni inuttat kattuffianni ACU-mi siulittaasoq Anders Mark Jensen Sermitsiaq.gl-imut oqarpoq.
Air Greenlandip timmisartuni inuttaasartui danmarkip nalunaaqutaa malillugu nalunaaqutaq 8 sulinertik unitsereeraallu nunatsinni timmisartuussinerit tamarmik maannakkuugallartoq unitsinneqarsimapput, aamma taamaappoq Købehavnimiit Kangerlussuarmut aqqut. Timmisartuni inuttat akissarsiatik atorfimminnilu atukkatik naammaginngilaat taamalu Air Greenlandip aqutsisuinik isumaqatiginninniarnissartik piumasaralugu.
Air Greenlandip pisortaanera Michael Binzer marlunngornermi ullaap tungaa ilisimatitsivoq, isumaqatigiissutinik unioqqutitsilluni sulianik unitsitsinerit ingerlatillugit Air Greenlandip aqutsisui isumaqatigiinniarnernut peqataajumanngitsut.
– Sulisut suliumajunnaartut unannut nalunaarutigaat suliumajunnaarnertik ingerlatiinnarniaritsik aammalu isumaqatigiinniarnerni naapinnissarput piumasaralugu. Kisianni oqarnittuut Air Greenland aamma timmisartuni inuttat ullaap tungaa imminnut assut ungasipput, Anders Mark Jensen oqarpoq.
Air Greenlandip timmisartunut ilaasussat sulinerminik unitsitsinermit eqqorneqaqrtussat qassiuneri suli oqaatigisinnaannginnerarpai. Jørgen Erik Andersen Air Greenlandimeersoq Sermitsiaq.gl-imut ilisimatitsivoq, paasissutissanik nutaamik ullup qeqqartinnagu saqqummiussissallutik.