Timmisartuni saqisut suliartoqqunneqarput

Air Greenlandip sulilermik unitsitsinerup isumaqatigiissutinik unioqqutitsineragaanera Dansk Funktionærforbund-ip taperserpaa taamalu timmisartuni saqisut suliartoqqullugit inallugit.

Air Greenlandip timmisartuni saqisui kattuffimminnit pingaarnermit Dansk Funktionærforbund-imit Danmarkimi LO-p ataani inissisimasumit ullaaq manna suliartoqqullugit naalakkerneqarsimapput. Taamak air Greenlandip pisortaanera Michael Binzer ilisimatitsivoq. Taassuma maanna timmisartuni saqisut ilisimatissimavai suliartornissaat naatsorsuutigigini, aammalu saqisut taamaaliorumassanersut sulisuminit ilisimateqqulluni.

Michael Binzer naapertorlugu Dansk Funktionærforbund-ip sulinermik unitsitsineq isumaqatigiissutinik unioqqutitsinerusoq nassuerutigisimavaa.

– Kalaallit Nunaata nalunaaqutaa malillugu nal. 8 periarfissiissutigaarput. Timmisartuni saqisut suliartunngippata suliaq sulinermut tunngasunik eqqartuussivimmut tunniutissavarput, timmisartuni saqisut psuliartortariaqartut piumasaqaatigalugu aammalu akiliisinneqarnissaannik piumasaqaateqarluta, Michael Binzer oqarpoq.

– Timmisartuni saqisut isumaqatigiissummik namminneq atsiukkaminnik unioqqutitsisuupput. Isumaqatigiissut Air Greenlandip soorunami sullitatsinnut neriorsuutigisimasatsinnik eqqortitsiniassagutta pinngitsoorsinnaanngisarput, Michael Binzer oqarpoq.

– Suliaq paatsuugassaanngilaq aamma Dansk Funktionærforbund-ip taperserpaatigut timmisartuni saqisut isumaqatigiissummik unioqqutsitsisumik sulinerminnik unitsitsisimappata isumaqatigiinniarnerit ingerlanneqarsinnaanngimmata.

Timmisartuni saqisut peqatigiiffianni siulittaasoq Anders Mark Jensen ullaq manna nal. 7.15 suli suliartoqqusissummik tigusaqarsimanngilaq.

– Dansk Funktionærforbund-imiit tusagaqaqqivippunga, aamma Dansk Funktionærforbund-imik ataatsimeeqateqartoqarsimanera ilisimasaqarfiginngilara. Isumaqatigiinniarneq taamaak ingerlasoq eqqumeeqaaq, Anders Mark Jensen oqarpoq.

Timmisartuni saqisut ullaaq manna tusagassiutinut nalunaarummi imatut allapput:

»Ullap tungaa aqutsisut uagullu siulittaasutta akornanni ataatsimeeqatigiisitsiniarneq misilissimanngilarpulluunniit. Ajoraluartumik aqutsisut suli oqaloqatigiinnissaq sunaluunniit itigartippaat. Uagutsinnut puullaaqissutaaginnartumik aqutsisuniit tigusatuagut tassaapput sioorasaarinerit itigartitsinerillu.

Aqutsisut sulisumik toqqissisimanissaannut akisussaanertik tigussagaat tatigaarput ataatsimeeqatigalutalu, taamaalilluta ataatsimoorluta aaqqiissutissanik aqqutissiuussissagatta.

Timmisartunut ilaasugut uani Air Greenlandip iluani aaqqiagiinnginnermi sallunaveeqqutitut pineqalernerat ajuusaarutigaarput. Neriuutigaarput suliarput piaartumik nangeqqissinnaajumaarlutigu aammalu suliffeqarfiup tusaamaneqarneratuut pitsaalluinnartumik kiffartuussisinnaaleqqissalluta«.

Aqqiagiinnginerit peqqutigalugit Air mGreenland timmisartuussivimmini ullimikkut aamma kinguaattooruteqarpoq.

Københavnip Kangerlussuullu akornanni timmisartuussinerit (GL 781/GL 782) aallaqqaammut qallunaat nalunaaqutaat malillugu 5 tiiminik kinguartillugu 14.15 pisussanngortinneqarsimavoq. Københavnip Narsarsuullu akornanni timmisartuussineq (GL 785/GL 786) ilersaarutit malullugit ingerlanneqassaaq atorfilinnit saqisoqarluni

Kalaallit Nunaata iluani timmisartuussinerit suli kinguaattoorsimaannarnissaat naatsorsuutigineqarpoq.

Air Greenlandip ilaasussat www.airgreenland.gl-imi ’aallartussat & tikittussat-nut paasiniaasaqqullugit innersuuppai.’

Powered by Labrador CMS