Aaqqiagiinnginneq akisooq
Ilaasut 700-800-t aaqqiagiinnginnermit eqqorneqarput.
Timmisartumi saqisut isumaqatigiissummut unioqqutitsillutik suliumajunnaarnerat aningaasarpassuarnik naleqarpoq Dannmarkimi Kalaallit Nunaannilu inuppassuarnut akornusiilluni.
Tuniniaanermut nittarsaassinermullu pisortaq Christian Keldsen naapertorlugu Air Greenlandimut aningaasartuutit ullut tamaasa 500.000 aamma 700.000 kr. akornanni amerlassuseqartarput. Taakkunani allap timmisartuutaanik attartornermut aningaasartuutit ilaanngillat. Tamanna pisariaqalissappat aningaasartuutit marloriaatinngussapput.
Suliumajunnaarnerup marlunngorneq-pingasunngorneq eqqarsaatigalugit Kalaallit Nunaanni Danmarkimilu ilaasunik 700-800-nik eqquivoq. Sisamanngornermut aaqqissutissaasinnaasut tamaasa sulissutigaavut, taamaattumik aqagu ilaasit qanoq amerlatigisut timmisartuussinnaajumaarnerlugit oqaatissallugu suli siusippallaarpoq, Christian Keldsen oqarpoq.
Isumaqatigiissutinik unioqqutitsilluni suliumajunnaarneq aqutsisuniit ”force majeur”-itut – tassa aqunneqarsinnaajunnaartutut nalilerneqarpoq. Taamaakkaluartoq Air Greenlandip ilaasut ingerlaqqissinnaajunnaaqqasut hotelini inissaqartillugillu nerisaqartippai, Christian Keldsen ilisimatitsivoq.