RAL amigartooqqarluni imarsiorpoq

2007-ip ukiup affaata siulliup naatsorsuutaata takutippaa suli akileraartigani 12,7 millioner koruninik amigartoortoq, assartukkat ikileriarsimammata.

Royal Arctic Line 2007-ip ukiuata affaata siulliani suli akileraartigani 12,7 millioner koruuninik amigartoorpoq. Ukiup ataatsip matuma siorna piffissami tamatumanerpiaq suli akileraartigani 3,3 millioner koruninik sinneqartoorpoq.

Amigartoornermut pissutaavoq Royal Arctic Linep ukiup affaata siulliani assartugai 2006-mut sanilliullugit ikinnerummata. Royal Arctic Line 362.000 kbm-erinik ukioq manna arsartuussivoq 389.000 kbm-erinik 2006-mi assartuussilluni.

Royal Arctic Linep ukiup affaata siulliani kaaviartitaasa inernerisa aamma takutippaat kaaviartitat ikileriartut, raajat nunatsinnit assartuunneqartut ikileriarsimammata. RAL umiarsuaatileqatigiiffinnut allanut akitigut unammillikkaminut aamma unammillernermigut iluanaarutilissuunngilaq, naatsorsuutigisamit ikinnerusunik isertitaqarluni. Umiarsuaatileqatigiiffiit allat unammillertagai tassaapput aatsitassanik piaaffinnut assartuussisartut imaluunnit erngup nukinganik sarfaliorfinnut assartuussisartut.

RAL-ip piginneqatigiiffigisaasa ilaat, piginneqatigiiffiit allanit aqunneqartut, RAL-ip ukiup affaata siulliup naatsorsuutaata inerneranut ikinnerusunik isertitaqarfiupput, naatsorsuutigisamit assartuutassat ikinnerusimammata. Royal Arctic Bygdeservice A/S’ ukiup affaata siulliup naatsorsuutai amigartooruteqaratillu sinneqartuunngillat.

Powered by Labrador CMS