Maasinnguaq Mølgaardip kapisilimmut nalunaaqutsiussaq akissarsissutigaa
Maasinnguaq Mølgaard Sisimiuneersoq 7.900 koruuninik pisuunnguallappoq Pinngortitaleriffimmut kapisilimmut nalunaaqusiussap nassiutereernerata kingorna.
Juliane Mølgaardip akissarsiamik uini sinnerlugu tigusisuuvoq, tassami uia Sisimiuni silageqimmat arfanniarluni aallasimavoq. Akissarsiaritinneqartorlu Naalakkersuisut sinnerlugit borgmester Hemann Berthelsenip tunniuppaa.
Maasinnguaq Mølgaard Sisimiut eqqaani 2008-mi kapisilimmik nalunaaqutsikkamik pisaqarami nalunaaqutsiussaq Pinngortitaleriffimmut nassiuppaa. Kapisilik canadamiut aggutsimi 2007-imi Canadami kuummi Restigauche Riverimi nalunaaqutsersimavaat.
Atlantiku avannaani kapisillit nakkutigineqarnissaannut kattuffik NASCO akissarsisitsinermut tunuliaqutaavoq,
NASCO kapisilinnik nalunaaqutsiisarnermik ingerlatsivoq tamatumani siunertaralugu kapisilinnut nalunaaqutsiunneqarsimasut ilisimatusarnermik suliaqartunut utertillugit nassiunneqartarnissaat.
Kapisillit nalunaaqutserneqartarput kapisillit sumi pisarineqartarnerat aamma ingerlaartarnerat paasisaqarfiginerorusullugu. Suliniummullu atatillugu ukiut tamaasa NASCOp nunani assigiingitsuni ataatsimiititaliaqafigisaani akissarsiassat 1.500 dollarit tunniunneqartarput. Kalaallit Nunaata Kitaani ataatsimiititaliamut ilaasortat tassaapput Canada, USA, EU aamma Kalaallit Nunaat.