Toqusut tallimaagaangata ataaseq nalinginnaanngitsumik toqquteqartarpoq
Kalaallit angutit inuusuttorpassuit nalinginnaanngitsumik peqquteqartumik toqquteqartartut kisitseqqissaartarfiup takutippaa
Toqusut tamarmiusut tallimararterutaat ajutoornernit, imminornernit toqutsinernilluunniit pisuupput. Kalallit Nunaata Naatsorsueqqissartarfianni takuneqarsinnaavoq, 2005-imi toqusimasunit 466-iusunit toqusut 92 nalinginngaanngitsumik toqquteqarsimasut. Nalinginnaanngitsoq toqutsinernut, imminornernut ajunaarnernullu ataatsimut taaguttaartinneqarpoq. Toqusut taakku toqusut tamarmiusut 20 %-tingajaraat. 2004-mi toqusunit 475-init 94-it nalinginnaanngitsumik toqquteqarsimasutut nalunaarsorsimapput.
Toqusut sisamaagaangat pingasut inulaarlugit angutaasarput. Annermik angutit inuusuttut 15-nit 24-illu akornannik ukiullit amerlanersaat nalinginnaanngitsumik toqquteqartarput. Kalallit Nunaanni angutit akornanni toqusartut akornanni 26 pct.-it toqutsinermit, imminornermit ajunaarnermilluunniit toqquteqartarput. Tassa sisamaraarterutaasa annertoqataat.
Angutit akornanni nalinginnaanngitsumik toqquteqartartut taamak amerlatiginerisa taakku agguaqatigiisillugu ukioqqortussusiannut sunniuteqarpoq. 2005-imi 0-inik ukiulinnut agguaqatigiisillu inuuneqqortussuseq angutinut 65,5-iuvoq arnanullu 70,9-iulluni.
»2005-imi innuttaasut ingerlaarnerat«-ni takuneqarsinnaavoq 2005-imi nukappiaqqat 454-it niviarsiaqqallu 433-it inunngorsimasut. Peqatigitillugu angutit 260-it arnallu 206-it toqusimapput. Inunngortartut amerlanerugaluartut tamanna innuttaasut ikileriarnerannut iluaqutaasimanngilaq, tassa nunatsinniit aallartartut nunatsinnut nuuttartunit amerlanerummata. 2005-ip ingerlanerani innuttaasut 68-inik ikileriarsimapput, taamaalilluni 2006-imi januuaarip aallaqqaataani inuit 56.901-iupput, ukiup siuliani 56.969-iusimallutik.