Nunatsinni peqqinnissaqarfinnik nakkutilliisumut ilinniartitaaneq kinguarsarneqartoq
Nunatsinni peqqinnissaqarfinnik nakkutilliisumik ilinnniartitsinissaq millionilikkaanik nalilik Namminersornerusuni unittooqqavoq
Taama Naalakkersuisut inatsisartunut ilaasortamut Asii Chemnitz Narupimut Inuit Ataqatigiinneersumut akissumminni allapput.
Peqqinnissaqarfinnut nakkutilliisoqarfik 2007-imut koruuninik 1,1 millioninik, aammalu 2008-mi 2009-milu qaavatigut koruuninik 1,1 millioninik aningaasaliiffigineqarpoq, Peqqinnissaqarfinnik nakkutilliisoqarfimmi ilinniartitaanermut atorfimmik taallugu pilersitsinissamut atugassanik.
Nakorsamik Peqqinnissaqarfimmi nakkutilliisussussamik nunatsinneersumik ilinniartitsinissap siunertarigaluarpaa immikkut ilisimasalimmik nunami allamiumik isumalluutaarunnissaq, minnerunngitsumik ukiuni kingullerni peqqinnissaqarfinnik nakkutilliisumik aalajangersimasumik atorfilimmik atorfinitsitsiniarneq ajornakusoorsisimammat
Naalakkersuisunut ilaasortaq Aqqalu Abelsen naapertorlugu ilinniartitaanermup ingerlanissaa piareersimavoq aammalu atorfiup inuttassarsiuunneqarnissaata allagaqartassartaa piareersimalluni.Tamatumali kingorna suliaq unissimavoq maannalu ukioq ataasinngulersoq Namminersornerusut isumaqatiginninniartartuisa allaffiani uninngalluni.
Suliaq 2006-imi oktobarip aappaani Aningaasaqarnermut pisortaqarfimmi isumaqatiginninniartarnermik immikkoortortaqarfimmut nassiunneqarpoq, kattuffik attuumassuteqartoq akissarsiat pillugit isumaqatiginiarneqarnissaa siunertaalluni.
– Atorfimmut inaarutaasumik akissarsiaqarfimmut sorlermut inissinnissaa suli inissinneqanngilaq, taamaattumik atorfik taanna suli inuttassarsiuunneqarsinnaasimanngilaq, Aqqalu Abelsen akissummini allappoq.
– Peqqinnissaqarfinnik nakkutilliisoqarfiup naatsorsuutigaa atorfiup siusinnerpaamik 2008-mi inuttalerneqarsinnaanissaa, Aqqalu Abelsen akissummini ilisimatitsivoq.