Imigassartorsimalluni biilertut sakkortunerusumik pineqaatissinneqartassapput
Naalakkersuisut promillemut killigititaasartoq appasinninngortinniaraat webavisen.gl allappoq.
Kalaallit Nunaanni imigassartorsimalluni biilertarneq eqqarsaatigissangaanni aqqusinikkut angallannermut inatsit 1992-imeersoq pisoqalisimavoq. Taamaattumik Naalakkersuisut promilleqarnermut killigititaasoq malunnartumik appartinniarpaat.
Taamaalilluni imigassartorsimalluni biilersimanermi promilleqassutsimut killigititaasup 1,20-imiit 0,5-imut appartinnialersaarneqarpoq, peqatigitillugulu taaguut promilleqarpallaarluni biilerneq atorunnaassaaq, webavisen.gl ilisimatitsivoq.
Siunnersuummi aamma aqqisinikkut angallannermut inatsimmut maannakkut atuuttumut tunngatillugu imigassartorsimalluni biilertunut pillaatit arlallit atuutilersinneqarnissaat ilaatinneqarput, assersuutigalugu imigassartorsimalluni biilersimanermut atatillugu qamutinik motorilinnik arsaarinnissinnaatitaaneq.