Jonathan Motzfeldt: - Nunarsuatsinni eqqisseqatigiitta
Nunarsuatsinni naalakkersuinikkut upperisarsiortullu assigiinngitsut siuttuiIlulissani ullumi qinuteqatigiipput.
Nunarsuatsinni upperisassarsiortut siuttui Ilulissani ulluni makkunani ataatsimeersuarput.
Umiarsuarmut takornariartaammut FRAM-mimut ilaallutik ilulissat Ilulissat kangerluata paaviniittut ullumi pallittorpaat, tamaani ataatsimoorlutik nunarsuatsinni avatangiisit pillugit qinnussillutik.
FRAM umiatsianik 18-nik qaannanillu 11-nik ingiallorneqarpoq. Qajartortartut ilaat inuusuttoq upperiasassarsiortut siuttui qajartullaqqinnerminik aamma takutitsigujoq. Erinarsoqatigiit Ilulissat Nipaat pinngortitaq pillugu erinarsuutinik marlunnik tusarnaartitsipput. Qinnussineq nal. 12. aallartippoq.
Palasi inatsisartullu siulittaasuat Jonathan Motzfeldt qinnussinermik aallarniivoq ilaatigut oqarluni:
- Upperisarsiorneq sunaluunniit ajunngitsuusoq, uatsinnillu ajunngitsuunissamik ilinniartitsisoq paaseqatigiissutigalugu ataatsimoorluta naapeqatigiippugut.
Uppertut amerlasoorpassuit uummatitsinnit pisumik qinunikkut Nunarsuatta siunissaa pitsaasumik pisariaqarneratullu sunniivigisinnaajumagipput ataatsimoorluta isuma-qarpugut.
- Guutip inuttut silaqassuseqalersimavaatigut. Silaqassuseq isumatusaarnerlu atorlugit Nunarsuarmi eqqissisoqarnissaa Nunarsuarmi siuttuusut qulakkiissagaat qinuniarta.
- Kalaallit – Issittumilu inuit allat – nunarsuup kissatsikkiartorneranit pilersinneqartumik inuuniarnikkut atugarisamik allanngornerisigut ilungersornartorsiulereerput. Nunarsuarmi inuit tamakkerlugit qinnunnerini taakku ilanngutsigit – nalaataminni iliuuseqarfissatik aaqqiivigisinnaajumallugit nukissamik nassaarsiullaqqissutsimillu pisariaqartitaminnik nanisissasut neriuutigalugu.
- Avatangiisinut Nunarsuullu inuinut annertuumik ajoqusiisuusumik inummit pilersin-neqartumik pinngortitap ajoqusiivigineqarnissaanik pinngitsoortitsinissamut ataatsi-moorluta uppersuserput qanortoq sunniuteqarli, Jonathan Motzfeldt qinnussinermi oqarpoq.