Nunamed silarlummik eqqorneqarpoq
Timmisartut Nuummut timmisartuussisussaagaluit uniinnartariaqarnerisa kingunerisaanik peqqinnissaq pillugu, Nunamed, ataatsimeersuarnermi peqataasussat uniinnartariaqarput.
Anorersuarnera pissutigalugu Air Greenlandip Kangerlussuarmit tallimanngornermi timmisartuussassani unitsiinnartariaqarsimavai. Uniinnartariaqartut ilaat tassaapput nunatsinni peqqinissaq pillugu ataatsimeersuarmi, Nunamed, peqataasussat.
Kangerlussuarmiittariaqartut amerlanersaat tassaapput Danmarkimeersut. Nunatta illoqarfiisa ilaanni aggersussat amerlanersaat Nuummut sapaatip akunnerata ingerlanerani tikereerput, peqqinnissaqarfimmi aqutseriaaseq pillugu ataatsimeersuarnermut peqataallutik. Taanna Nunamed pinnginnerani ataatsimeersuarneruvoq, nakorsaq Gert Mulvad Nunamedmik aaqqissueqataasoq Sermitsiaq.gl-mut ilisimatitsivoq.
Taassuma qilanaarutigalugu oqaatigaa Nunamedimi oqalugiartussat tamarmik Nuummut arfinninngorpat tikissimanissaat neriuutigalugulu peqataasussat tamarmik aamma tikissimanissaat.
- Kalaallit Nunaanni sila naalagaasarpoq. Neriuutigaarpulli Air Greenlandip peqataasussat kingulllit aamma anngukkumaarai, Gert Mulvad oqarpoq.
Nunamed arfininngornermi ullaakkut allartissaaq ataasinngornermi unnukkut naammassissalluni.