Tuluit Kalaallit Nunaat ilisimasaqarfiginngilaat
Tuluit Kalaallit Nunaat Ilisimasaqarfiginngilaat. Tamanna Kalaallit Nunaanni Takornariaqarnikkut Inuussutissarsiornikkullu Siunnersuisoqatigiit Gaalup-ikkut misissuisitsinerata kingulliup takutippaa.
Tuluit Kalaallit Nunaat ilisimasaqarfiginngilaat. Ajoraluartumillu Kalaallit Nunaata sumiinneranik ilisimanninngitsut tuluiinnaanngillat, taamak KNTIS-imi nittarsaassinermut pisortaq Niels Feerup KNR-imut oqarpoq.
- Kalaallit Nunaannik ilisimanninnerit annikeqaat. Inuit misissuinitsinni peqataasut amerlasoorpassuit akissuteqarput, Kalaallit Nunaat ilisimasaqarfiginagu, Niels Feerup oqarpoq.
- Isumaqarpunga inuit taamak ilisimasakitsiginerat inuppassuarnut tupaallaataasoq. Soorunami suliniutissaraarput. Aallaqqaammulli USA-mi, Tuluit Nunaanni Tysklandimilu taamaaliorniarpugut.
Ilisimanninneq taamak annikitsigigaluartoq inuit aalajangersimasut Kalaallit Nunaannik ilisimasaqarluartut Gallup-ikkut misissuisitsinerup takutippaa.
- Takornariat nunap timaani angalaartartut Kalaallit Nunaannik ilisimasaqarnerpaapput, annermillu Kalaallit Nunaata kujataa eqiteruffigalugu, tamanna angalaarfigissallugu assut pilerigineqaramami. Aamma tuluit Island aqqusaarlugu Kalaallit Nunaata kujataanukartartut amerlasuujusut ilisimaaraarput, Niels Feerup erseqqissaalluni KNR-imut oqarpoq.