Canada Goosep nunarput nuannareqaa
- Kalaallit Nunaat pisuulluni Canada Goose jakkit atorluarneqartorujussuanngorsimapput, siammarterisoq oqarpoq. Canada Goose aamma Nuummi Sisorarfinnut tapersersuisunngorsimavoq, atuakkiorsimavorlu ilaatigut Kalaallit Nunaat pingaarnerutillugu.
Ulluni makkunani nunarput europami amerikallu avannaani nittarsaanneqarpoq. Kalaallit Canada Goosenik atortut, nunatsinni pinngortitarsuarmi assilisissimasut, nunani taakkunani pisiniarfiit nuimasuut igalaavini takussaapput.
- Ray Fine, tassaasoq Canada Goosenik siammarterisoq, europami tuniniakkaminik nittarsaassileruttorpoq. Nunatsinniissimavorlu assilisissinnaasunik ujarlerluni, assiliillunilu. Tassami atisat Canada Goosemeersut nunatsinni atorluarneqaqaat, aammalu takoqqusaarutit nunatsinnut annguttussaapput, Canada Goosep nunatsinni attaveqaataa Dan Jeppson oqarpoq. Taassuma ilanngullugu oqaatigaa Canada Goosep nunarput assut nuannarigaa. Ilanngullugu oqaatigaa Canada Goose Nuummi sisorarfinni tapersersuisunngorsimasoq.
”Ask anyone who knows”
Josh Finep oqaatigaa namminneq oqaasinnaarigitsik ”Ask anyone who knows” (”Nalunnginnittut aperikkit”)
- Silap issittup pissusaanik atisarisariaqakkanillu nalunnginnittuunerpaat tassaapput kalaallit. Ukiut kingulliit qulit Canada Goose Kalaallit Nunaanni siammarterparput. Aallaqqaammut ilisimaneqarpallaanngilagut, taamaallaat ilisimasassarsiortunit Air Greenlandimilu sulisunit jakkit atorneqarput. Ukiullu ingerlanerini paasineqariartorput jakkit Kalaallit Nunaanni silamut tulluuttuusut, kalaallillu pisooqataapput jakkit taakku nunarsuaq tamakkerlugu atorumaneqariartornerinut, Josh Fine oqarpoq. Jakkimmi allaat Romimi, issinneq ajortumi pineqarsinnaapput. Bill Clintonimigooq aamma Canada Gooseqarpoq, Nuummilu aniguit takusinnaavat Canada Gooserpassuit aqqusinermi angalaartut.
Canda Goosettaaq ukioq manna ukiunik 50-iliilluni nalliuttorsiornermut atatillugu atuakkamik saqqummersitsivoq – ”Goose people”-mik taasaminnik. Atuagaq nunani tamalaaniit apersuinernik assinillu imaqarpoq. Nunat pineqartut tassaapput Canada Goosep sanaavinik atuiffiunerit. Aamma nunatsinneersunik imaqarput.
- Inuit taakku akornanni piniartoq timmisartortartorlu ilaapput, taakku apersorneqarput oqaluttuaallu atuakkamiipput. Atuagaq nunatsinni ukioru saqqummissaaq, tassungalu atatillugu arlaannik aaqqissuissamaarpugut, Canada Goosellu piginnittua maanngartinniarsarissavarput, Dan Jeppson oqarpoq. Atuakkamit sinneqartoorutit tamarmik suliniutinut pitsaasunut ingerlassapput, atuagarlu nunanut 30-nut tunineqassaaq.
Misiliutitut ukioq manna Canada Goosep nunatsinni pisisartuminut ”Canada Goose for Babies” meeraaqqanut qaatiguut annikikkaluartut nassiutissavai. Pisisut iluarisimaarinnippata, tunisallu naammassappata aappagu taakku nunarsuaq tamakkerlugu siammarterneqassapput.
Uani kalaallinik Canada Gooselinnik takugit http://www.rfeeuropa.ca/main.html