Angajoqqaarsiaasartut siulittaasuata nammineerluni sillimmasiisarnissaq kamaatigaa
Nuummi angajoqqaarsiat siulittaasuata 25.000 koruuninik nammineerluni sillimmasiisarnissaq iluarinngilaa
– Nunami maani sanngiinnerpaat, tassalu meeqqat inuusuttullu sumiginnakkat akisussaaffigigatsigit nunatsinnut ikiuutaaqaagut. Kisiannili taamatut akisussaaffeqarnerput uatsinnut taama akisutigissappat akuerisinnaanngilarput, Ellen Sofie Chemnitz, Nuummi angajoqqaarsiaasartut peqatigiiffiani siulittaasoq oqarpoq.
Taamatut akerliuneq takkuppoq Nuup Kommuneata Angajoqqaarsianik isumaqatigiissutaanik taaneqartartumi kommunip akisussaaffimmut sillimmasiisarnerani imatut allassimasoqarmat: "Angajoqqaarsiat akisussaaffiannut matussusiisinnaanngilaq, tassami angajoqqaarsiat meerarsiaqarnissaminni nammineerlutik ajutoortoqariataarsinnaanera akuerinikuummassuk. Tassani ajutoornermi ataatsimi nammineerluni kr. 25.000,-inik sillimmasiinissaq pineqarpoq. Tassa imaappoq suliassat 25.000 koruuninit ikinnerusunik nalillit pillugit sillimmasiisarfiit isumaqatiginninniarfigineqarsinnaanngimmata."
Ellen Sofie Chemnitzip angajoqqaarsiaasartut Angajoqqaarsianut isumaqatigiissut atsiortassanngikkaat kaammattuivoq, tassami taassuma oqarneratut nammineerluni sillimmasiinissaq isumaqatigiissummi imaluunniit Inatsisartut peqqussutaanni eqqaaneqarsimanngimmat.
– Meeqqat kommune sinnerlugu ikiorusutavut ajoqusiigarluarpata aningaasatigut artorsartinneqarnissarput akueriuminaatsippara, Ellen Sofie Chemnitz oqarpoq.