Kunngissaq Qaanaamiit inuulluaqqutittoq
Kunngissaq Frederik sulinerminut atatillugu pingasunngormat Red Barnet-imut pulaarpoq. Kunngissaq Red Barnetimut illersuisuuvoq tassanilu Danmarkimi nunanilu tamalaani meeqqanik atugarliortunik sullissineq sukumiinerusumik ilisimasaqarfigilerpaa.
Kunngissaq Frederik 9. septembarimi nuna tamakkerlugu katersinissaq pillugu sulinermik nassuiaanneqarpoq – katersinissaq ukiumanna Angolamut tunngatinneqarpoq. Generalsekretær Mimi Stilling Jakobsenip Angolamut tikeraarnini oqaluttuaraa, tassani meeqqat 1,5 millionit atuartuunngillat, meeqqat naalagaaffiup inuisa imminnut sorsuunnerannit naammasseqqammersumit suli atugarliortitaapput, Angolamilu Red Barnet meeqqat atuartunngortinniarlugit, ilinniartitsisussanik ilinniartitsiniarluni il.il. suliniuteqarpoq.
Kunngissaq Avannaani Qaanaamit ilisarisimasaminit inuulluaqqutikkami assinillu isiginnaarami nuannaartorujussuuvoq. Ornittagaq nammineq suliniuteqarfigisimasaa aningaasaliiffigisimasaalu kunngissap kissaateqarneratuut ingerlalluarpoq – meeqqanut inuusuttunullu eqqissisimaarfissaq, taamatut Red Barnet nittartakkamini allappoq.