Illoqarfimmi nutarsaanermi inuusuttut peqataatinneqartut
Ineqarnermut pisortaqarfiup, inissiatileqatigiiffiup INI-p aammalu Nuup Kommuneata suleqatigiillutik illoqarfimmi nutarsaanermi suliniutaanni inuusuttut atuanngiffeqarnerminni ikiortigineqarput.
- Inuusuttut 16-it 15-niit 16-iunut ukiullit viceværtip ikiortaattut junip 25. - ianili sammisassaqartinneqarput. Taakku suliassanik oqinnerusunik suliaqartinneqarput, soorlu torsuusani sanerlutik asaallutillu. Kingusinnerusukkut inuusuttut ”Tjansen”-imik taaguusikkavut pinnguartarfinni nutarterinerni aamma ikiortigineqassapput, suliniummut pisortaq Britta N. Johansen Nuuknyt-imut (Nuup Kommuniata nittartagaanut) oqaluttuarpoq.
- Isumaqarpugut inuusuttunik sammisassaqartitsineq aserorterisarnermut pinaveersaartitseqataasoq. Inuussuttut inuusuttoqatiminnik najugaqarfinni eqqiaasut suleqataasullu takunnittarnerat aserorterinaveersaartitsinermik kinguneqartarpoq, INI-mi inissianik nakkutilliisoq Abel Egede oqarpoq.
Inuusuttut atuanngiffeqarnerminni sammisassaqartinneqarnertik iluarilluinnarpaat.
- Sammisassaqartinneqanngitsuuguma ullup affaa sinittassagaluarpunga, aammami aningaasarsisaratta iluaqaaq, 15-inik ukiulik Hans Jørgensen oqarpoq.
Inuusuttut atualeqqikkunik atuareernerup kingorna saamisassaqartinneqarnissaminnik neqeroorfigineqarput.
Illoqarfimmi nutaarsaanermi suliaqartut inuit marluusut Radiofjeldimi allaffittaaqqammerput. Taakku pingaarnertut suliassaraat Radiofjeldimi, Narsarsuarmi kiisalu blok P-mi ukiuni tulliuttuni nutarteriniarluni pilersaarusiornerni najugaqartut peqataatinnissaat aammalu najugaqartut oqartussaaqataatinnerulersinniarlugit suliniuteqarnissaq.