Lufthansa Air Greenlandimi piginneqataalersinnaavoq
Sisamanngormat video atorlugu tusagassiortunik katersortitsinermi suliffeqarfissuup SAS-ip pisortaa, Mats Jansson oqarpoq SAS-ip Air Greenlandimi piginneqataassutini qanittumi tuniniarneqassasut', Travel People allappoq.
Travel Peoplep suliamik naliliinera malillugu pisisinnaasut marluinnaapput. Aappaa tassaavoq Namminersornerullutik Oqartussat aappaalu tassaavoq Lufthansa.
Ukioq 2000-imiilli Air Greenlandip takuttareernikuuaa ingerlatseqatigiiffik nammineerluni ingerlasinnaaasoq taamaattumillu nunani allani timmisartuutileqatigiiffimmit ikiorneqarnissaa pisariaqanngitsoq. Tamanna pissutigalugu Travel Peoplemi isumaqartoqarpoq Namminersornerullutik Oqartussat aktianik pisinissaat ilimanarnerpaasoq.
Nunat allat timmisartuutileqatigiiffiutaannit tyskit piat Lufthansa periarfissatuatut isigineqarpoq.
SAS-ip Air Greenlandimi aktiatai 37,5 procentiupput.
Naak SAS Air Greenlandimi piginneqataassuteqaraluartoq kalaallit timmisartuutileqatigiiffiat sukkulluunniit SAS-imit ikiorserneqarani nammineq ingerlasinnaasimavoq.