Nunaoil uuliasioqataaniarpoq
Ingerlatseqatigiiffik Kalaallit Nunaani uuliasiornissamut akuersissutinik tamanik 12,5 procentinik piginnittuuvoq.
Uuliasiorfiutileqatigiiffik Nunaoil Kalaallit Nunaata imartaani uuliamik gassimillu soqutiginnittoqaleriartornera ilutigalugu immap naqqani pisuussutit milliarderpassuarnik nalillit pillugit ujaasinermi pingaaruteqartuuvoq.
Tassami Nunaoil Kalaallit Nunaanni uuliasiornissamut akuersissutinit tamarmiusunit 12,5 procentinik piginnittuuvoq.
Tassani pineqartut tassaapput Canadamiut ingerlatseqatigiiffiat Encanap akuersissutaatai marluk; Lady Franklin aamma Nuup kujammut kitaani Atammik, Canadamiut ingerlatseqatigiiffiutaata allap Huskyp akuersissutaatai marluk Qeqertarsuup kujammut Kitaani Kangerluk aamma Ikermiut, aamma uuliasiornissamut akuersissutissat marluk Aatsitassat pillugit Siunnersuisoqatigiinnit ungasinngitsumi neqeroorutigineqartussat.
Ingerlatseqatigiiffiit allat akuersissutinut arlalinnut soqutiginnillutik nalunaareersimapput, ilaatigut Tuluit ingerlatseqatigiiffiutaat Cairn, uuliamillu ujaasinerni tamani Nunaoil akiliuteqarani 12,5 procentinik piginneqataasassaaq.
Piginneqataassutini tamakkunani nunat tamalaat uuliasiorfiutileqatigiiffii Nunaoilimik, taanna Namminersornerullutik Oqartussanit danskillu naalagaaffianit pigineqarpoq, piginnaanngorsaasussaatitaapput.
– Nunaoil Kalaallit Nunaanut uuliasiorfiutileqatigiiffinngortinneqarnissaa anguniagaavoq, direktør Hans Kristian Olsen oqarpoq.