Sanaartorneq annertusigaluartoq akissarsiat nikinngillat
Naalakkersuisut akunnattoorfiat: Sanaartornermi milliardinut suliassat akissarsianik qaffatsitsissanngillat.
Inatsisartut ataatsimiittarfiata allineqarnissaanik pilersaarut kinguartinneqarpoq. Pissutaasoq: Suliarinnittussarsiuussinermi allilerinissap sanasunit betonimillu suliassartaa ataasinnguamilluunniit neqeroorfigineqarsimanngilaq.
Taamaasilluni Inatsisartut naalakkersuisullu namminneq misigaat ukiuni makkunani Kalaallit Nunaanni sanaartornerup qanoq annertutiginersua. Taamaattumik naalakkersuisut 2008-mut aningaasanut inatsisissatut siunnersuumminni akunnattoorfeqarput.
Naalakkersuisut siunniuppaat aatsaat taamak annertutigisumik sanaartortoqassasoq 1 milliard koruuninut. Aappaatigullu naalakkersuisut akissarsianut sakkortuumik politikkeqarniarput, unammillersinnaassuseqarneq akissarsiat qaffannerisigut annikillisaqqunagu.
Kalaallit Nunaanni Sulisitsisut Peqatigiiffiata nuannaarutigaa ilaasortaminut suliassarpassuaqarnera.
– Sanaartortut siusinnerusukkut suliassat milliardinik nalillit ukiup ataatsip ingerlanerani ingerlattarsimavaat, taamaasioqqissinnaavugullu, pisortaq Ole Rud Sermitsiamut oqarpoq.
Taassuma tikkuarpaa 2008-mi sanaartornermut missingersuutinit 975 millioner koruuninit 325 millioner koruunit erngup nukinganik nukissiutit ineriartortinnissaannut atorneqassasut.
Entreprenøritut ingerlatsiviup Pihl & Søn-ip ukioq manna siusinnerusukkut Sisimiuni erngup nukinganik nukissiorfiup sananera aallartippaa, taanna kisimiilluni milliardip affaanik akeqarluni.
Kisianneqarporli.
– Namminersornerullutik Oqartussat sanaartornermut suliassaatini imatut piareersassavai, piffissami eqqortumi suliarinnittussarsiuuttassallugit, Ole Rud oqarpoq.
– Taamaanngippat kinguartitsisoqartassaaq, sanaartortut atuisullu atortariaqanngisaannik.
Kalaallit Nunaanni sanaartornermi ajornartorsiuterujussuaq tassaavoq sulisunik ilinniarsimasunik amigaateqarneq. Taamaattumik mesterit ilaat suliassanut naaggaartarput - soorlu ilaatigut inatsisartut ataatsimiittarfiata allineqarnissaani pisoq.
Naalakkersuisut ilinniagaqartitsinermik suliniuteqarnerujussuat Kalaallit Nunaanni Sulisitsisut Peqatigiiffiata tapersersorpaa, peqatigiiffiulli kissaatigaa sanasunik ilinniarsimasunik Danmarkip Nunallu Avannarliit avataannit tikisitsisarnissamut periarfissat pitsaanerusut.
– Killeqarfimmiit Hamborgimut Polenimilu sanasorpassuaqarpoq pikkorissunik peqarpoq, ullumikkulli Nunat Avannarliit avataannit sanasunik Kalaallit Nunaannut pissarsiniarnissaq ajornakusoorpallaaqaaq, Ole Rud oqarpoq.
Taamaattumik Kalaallit Nunaanni Sulisitsisut Peqatigiiffiata kissaatigaa sulinissamut akuersissutinik tunniussisarnerup eqaallisarneqarnissaa.
Sermitsiaq atuaruk...