Aluminiuleriffiup nassatarisassai misissorneqassasut
Tupaallannartunik nuanniitsunillu misigisaqarnissamut suleqatigiissitaq qularnaarussisuussaaq, AG allappoq.
Nassataasussat, ilaatigut avatangiisinut, sukumiisumik misissuiffigineqarsimatinnagit Alcoa nunami maani aluminiuliorfiliornissamut akuerineqarnavianngilaq.
Sap. akunneri marlussuit qaangiuppata Alcoa nunatsinnukartitsissaaq aluminiuliorfissap nassatarisassai kommunini naalakkersuisunit Alcoamillu aatsitsiviliorfissatut piukkunneqartuni innuttaasunik ataatsimiititsinernut pingasunut peqataajartortilluni.
Kommunit Sisimiut, Nuuk aamma Maniitsoq qaaqqusisuupput. Apriilimi Alcoamut suleqatigiinnissaq pillugu isumaqatigiissut suli atsiorneqanngitsoq naalakkersuisut suleqatigiissitamik pilersitsipput, aluminiuliorfimmik sanasoqarnerani nassataasussat pillugit avatangiisinik nalilersuisussamik.
Tamatuma saniatigut nassataasinnaasussat misissuiffigineqarnissaannut naalakkersuisut 4 millioner koruuninik immikkoortitsisimapput.
Suleqatigiissitamit, SMV-mik taaguuteqartumi (Strategisk Miljø Vurdering - Pilersaarusiornikkut Avatangiisinik Nalilersuineq), suliassaqarfinni pingaarnerni tallimani, avatangiisini, pinngortitami, kultureqarnermi, peqqinnissa- mi nunallu immikkoortuini ineriartortitsinermi, nassataasinnaasut misissuiffigineqassapput.
- SMV-mik suleqatigiissitamut suliassaq pingaarneq tassaassaaq, pineqartunut tallimanut aluminiuliorfiup sunniutigisinnaasaasa qanoq sakkortutiginissaannik nalilersuinissaq. Tamatuma kingorna nassatassat suut inooqataaffigineqarsinnaanerat naalakkersuinikkut aalajangigassanngussaaq. Taamaattumik pineqartunik naalakkersuinikkut pingaartitsineq soqutiginartuuvoq, SMV-mik suleqatigiissitamut siulittaasoq, Klaus Georg Hansen, namminersornerusuni Avatangiisinut Pinngortitamullu Pisortaqarfiup ataani nuna tamakkerlugu pilersaarusiortarnermut immikkoortortaqarfimmi aamma allaffimmut pisortaasoq, oqarpoq.
Illoqarfinni pingasuni aluminiuliorfissamik inissiivissatut Alcoamit isumaliutigineqartuni Alcoamit aamma SMV-mik suleqatigiissitamit peqataaffigineqartumik innuttaasunik ataatsimiititsisoqassaaq. Tamanna pissaaq Sisimiuni aggustip 27-ani, Nuummi aggustip 28-ani kiisalu Maniitsumi aggustip 29-ani.