Ukkusissami annaassiniarneq

Nuummi politiit qatserisartullu arnamik 28-nik ukiulimmik Ukkusissami ataasinngormat unnukkut annaassiniartariaqarsimapput. Arnaq Tysklandimeersuuvoq nunatsinnullu takornariartuulluni.

Politiit kissaatigaat Ukkusissap qaanut aqqusiortoqassasoq.

Ukkusissamut qaqiniarnermini ingerlariaqqiffissaaruttoorsimavoq, oqarasuaammillu angallattakkamik peqarallartilluni ikiortissarsisinnaasimalluni.

Arnaq akunnerit tallimat missaanni uninngareersoq ikiortissai takkussimapput.

Politiit qatserisartut ikiortigalugit arnamik annaassiniarput, ajoqusersimanngitsorlu oqqunneqarsimalluni.

- Piffissami kingullermi Ukkusissamut annaassiniaqattaartarsimavugut. Piffissaajarnarpoq, inuiaqatigiinnullu aningaasaartuutaasarsimalluni. Taamaammat Nuup Kommuneata teknikkeqarfianut saaffiginnissuteqarpugut, nalunaarsorluakkamillu Ukkusissami aqqummik sanasoqarnissaa piumasaralutigu. Aqqut pitsaasuusariaqarpoq, Nuummi politiit pisortaat Bent Heiselberg KNR-imut oqarpoq.

Powered by Labrador CMS