Littauer tunuartitaavoq
Karen Littauer Kalaallit Meerartaanni (Foreningen Grønlandske Børn) siulersuisuni qaammatini pingasuinnarni ilaasortaasinnarluni tunuaqqusaavoq.
Tusagassiutinut nalunaarummi Karen Littauer aamma Kalaallit Meerartaanni peqatigiiffimmi siulittaasoq, Mads Thyregod imatut allagaateqarput:
2007-imi maajip ulluisa arfineq-pingajuanni Karen Littauer Kalaallit Meeraataanni peqatagiiffimmut ilaasortanngorpoq. Karen Iittauer Tunumiu Orto Ignatiussen kiisalu kalaallit danskillu nammineerlutik piumassutsiminnik sulisut peqatigalugit ukiorpassuarni nammineq suliassatut pilersaarutigisaminik suliaqartarsimavoq, ilaatigullu 2006-imi Meeqqat pillugit sulisarnini pissutigalugu nersornaaserneqarpoq.
Maajip ulluisa qulinganni Karenimit e-mailikkut allagaq sakkortooq DR-ip nittartagaanut inissinneqarpoq. Tassani Karenip paasissutissiissutigaa ilanngutassiaq tamanut saqqummiussassaanngitsoq, tamannalu tusagassiortup ajuusaarutigaa. Tugagassiutitigulli annertuumik malersorneqalerpoq.
Namminersornerullutik Oqartussat maajip ulluisa aqqarnanni Qaanami imigassap tuniniarneqartarnera matuaat. Karen oqallinnermi aallaavittut imigassaannaq pinnagu aammali illoqarfimmi meeqqat oqartussaasunit illoqarfimmilu innuttaasunit immineerneqarsimasutut taasariaqartut eqqartorneqarnerannut piumanngikkaluarluni akuliutitinneqarpoq.
Kalaallit Meerartaanni siulersuisut ilaasortaasa ilaasa Karenip aamma Orto Ignatiussenip suliniutaat tusagassiutini pitsaanngitsumik eqqartorneqarnerat peqatigiiffiup sulineranut ajoqutaasinnaanissaa ernumassutigaat, taamaattumillu Karen peqatigiiffimmit suilersuisunut ilaasortaaneranit tunuaqqullugu kaammattorneqarpoq.
Tamanna tunngavigalugu Karen siulersuisunit ilaasortaajunnaarniarluni aalajangersimavoq, tassami oqaaseqaatinimi peqatigiiffimmut tutsinneqarnissaa kissaatiginnginnamiuk, taamaalillunilu kalaallit meerartaannik sullissinini akornuserlugu, tassami tamatumani meeqqat pineqarmata.