Unneqarinneq akeqarpoq
Qaanaami angajoqqaat erngunnerannik meeqqallu paarinerlutaanerannik oqarneq Karen Littauerimut Forening Grønlandske Børnip siulersuisuini ilaasortaanermik akeqarpoq, Ritzau allappoq.
Foreningen af Grønlandske Børnimi siulersuisut Karen Littauer siulersuisuni ilaasortatut soraarsippaat. Danskeq arnaq Kalaallit Nunaanni meeqqanut sumiginnakkanut arlalissuarnik suliaqartartoq, Qaanaami erngunnermik meeqqanillu sumiginnakkanik tunngasunik tupaallaannartumik oqaaseqartoq ilaasortatut suleqatigiumajunnaarneqarpoq. Oqaasii tunngaviullutik Naalakkersuisut meeqqanut inersimasunullu 600-nut suliniuteqartoqalerpoq.
Karen Littauer 43-riarluni Kalaallit Nunaanniissimasoq Qaanami meeqqanut inuussuttunullu qaammatini pingasuni isiginnaagassiorpoq. Maajimi angerlarami tusagassiutinut oqaluttuarpoq meeqqat qanoq atugarlioqalutik inuunerannik. Angajoqqaat silaarullutik meeqqaminnik isumaginnissinnaajunnaarlutik ernguttarnerannik aamma oqaluttuarluni. Taama oqaannartoq Naalakkersuisut imigassamik nioqquteqarneq unitsippaat. Taama pisoqarnerata nalaani Naalakkersuisut siulittaasuat Hans Enoksen politiikkerit allat ilagalugit Qaanaami pissutsinut takuniaapput.
Karen Littauerip pissutsinik tikkuartuinerata kingunerisaanik Qaanami imigissanik matusineq innuttaasunit mamiatsaatigineqaqaaq. Danskit isornartorsiusarnerat suli akueriuminaatsinneqarpoq. Aamma Foreningen Grønlandske Børnip, Københavnimi angerlarsimaffeqartup, meeqqat pitsaasumik atugalernissaannik suliuniuteqartup siulersuisuisa Karen Littauer ingasagilluinnarpaat.
Peqatigiiffimmi siulittaasoq Marianne Jensen Ritzauimut oqarpoq isornartorsiuinerup qanoq saqqummiunneqarsimanera ilaasortaajunnaartitsinermut pissuteqartoq.
- Kalaallit Nunaanni ukiorpassuarni misigisimavugut Danmarkimit aqunneqartutut. Uagutsinnut tunngasut pineqaleraangata akuutinneqartutut misigisimaneq ajorpugut. Karen Littauer Kalaallit Nunaanniinnermini isornartorsiuisimasariaqaraluarpoq Danmarkimiilernissani utaqqinagu, Marianne Jensen oqarpoq.
Karen Littauerip tuniarnini nammineerluni itisilerusunngilaa, oqaatigalugili ”siulersuisullu isumaqatigiissutiginngilarput Kalaallit Nunaanni pissutsit pillugit qaqugu qanorlu atsigisumik oqaaseqartoqarsinnaanersoq”. Kalaallit Nunaanniit aallalinnginnermini pissutsinik, oqaatigisani taakkorpiaat KNR-mut oqaatigisimanerarpai. Peqqissimissutissaqannginnerarpoq qularinnginnamiuk oqaatsiini Qaanaami meqqanut iluaqutaaginnassasut.
-Oqaatsikka poortorlugillusooq pisimasuuguma tassaqaana oqallittoqarsimassagaluarpa. Ajuusaarnarpoq pissutsinik tikkuartuisoqarsinnaanngimmat. Uparuartuinngikkutta Kalaallit Nunaanni meeqqat inuussuttullu kinguaariit pitsaasumik isumassorneqarneq ajortut annaginnarneqarsinnaapput. Isumassorneqarnissartik pisariaqartippaat, Karen Littauer oqarpoq.
Qaanaami meeqqanit angajoqqaanillu paqumitartunik oqaaseqarsinnaasimammat qujaniarneqarfigineqarsimavoq.
- Aamma angajoqqaanit kamattorujussuarnit kingorna qujaniarfigineqarpunga, taakku sianerfigaannga oqarlutik sassarterlunga taama oqarsinnaasimagama iluaralugu, Karen Littauer oqarpoq.