Qartiterinermit ujaqqat allanut tunineqaqqusaanngillat
Kommuneqarfiit kattuffiata KANUKOKA-p kommuninut erseqqissarpaa sanaartortitsisut akuerisaqqunagit qaartiterinermit ujaqqanik tunniaasarnissaannut, taamaasillunilu ujaqqerivinnik namminersortunik unammillerlutik.
KANUKOKA-p maanna kommuninut erseqqissarpaa sanaartornermik ingerlatsiviit akuerisaqqunagit qaartiterinermit ujaqqanik atunngisanik allanut tuniniaasarnissaannut, tamatumunnga akuersissuteqarnissamut periarfissaqaraluartoq nunaminermik tunisinermut atatillugu.
Assersuutigalugu sanaartornermut kommuni nunaminermik tunniussisarpoq. Taanna akeqanngilaq, KANUKOKA-lu naapertorlugu tamanna isumaqarpoq, sanaartornermut atatillugu issumik ujaqqamillu atortut sinneqartoorutit pisortanit pigineqartut.
Kommunalbestyrelsilli sanaartortitsisoq akuerisinnaavaa qaartiterinermit ujaqqat sinneqartoorutit allamut tunisinnaagai, nunaminermik tunniussinermi piumasaqaatimikkut.
Tamannali pitsaavallaarnavianngilaq, KANUKOKA isumaqarpoq. Tassami assigiinnassavaa sanaartortitsisunut ataasiakkaanut tapiissuteqarneq, tamannalu innuttaasunik assigiinngisitsinerussaaq, KANUKOKA quppernermi nittartakkamini allappoq, kommunillu siunnersorlugit tamanna illua'tungilerniarlugu nunaminermik tunisinermut malittarisassani aalajangersagalioqqullugit.
KANUKOKA aamma isumaqarpoq qaartiterinermit ujaqqanik tunisisinnaanermik akuersissuteqarnerup kingunerissagaa sanaartortitsisut pisariaqanngitsumik qaartitererujussuarnissamut ussernartorsiulernerat, ujaqqat sinneqartoorutit tuniniarumallugit.
Kommunilli qaartiterinermit ujaqqanik sanaartortitsisumut allamut tunisaqarsinnaapput, tamakkuali akeqartinneqassapput ujaqqerivinnik namminersortunik equngasumik unammillertitsinngitsumik, KANUKOKA erseqqissaavoq.