Inuunerinnerulerumallutik timersortut
Timersornermik unammisitsinerit Qeqertami sapaatip akunneri marluk ingerlareerlutik sapaammi Inuuneritta Cup 2007 naggataarnersiorneqarpoq.
Annonse
Pakassumminneq, arsaannerit, aalisakkamik anginermik pisaqarniunneq. Tamakku ilagaat Qeqertami Inuuneritta Cup 2007-mi sapaatip akunnerit marluk ingerlaneranni unammissutigineqartut .
Unammisitsineq Ilulissat Kommuneani pitsaaliuinermik siunnersortimit aaqqissuussaavoq.
- Inuit aalanerulernissaat, peqqinnarnerusumillu inuuneqalernissaq anguniarlugu Inuuneritta Cup 2007 ingerlanneqarpoq, pitsaaliuinermi siunnersorti Helga Nielsen oqarpoq.
Qeqertami katersortarfeqannginnera timersornernilu ingerlatsiffiusinnaasunik allanik peqannginnera peqqutaalluni Inuuneritta Cup 2007 asimi ingerlanneqarpoq.
- Iluarisimaarneqarpoq ataatsimoorfittullu atorneqarluni, Helga Nilsen oqarpoq.
Qeqertaq 146-nik innuttaqarpoq, Ilulissat Kommuneanullu atalluni.