Timmisartorsuaq utiinnarpoq

Air Greenland-ip timmisartorsua ippassaq Narsarsuarmut missinnaasimanngilaq Island-iliaannartariaqarsimalluni aammalu ullumi sisamanngornermi København-imut utiinnarpoq Narsarsuarlu angunngitsoorlugu.

– Taamaattumik ilaasussarpaaluit ornitaminnut aatsaat arfininngornermi 25. august apuunneqarsinnaassapput. Maannakkorpiaq ilaasussat Københavnimiit Narsarsualiartussaagaluit 98-iupput. Taakkua ilaat Kangerlussuakkoortinneqarlutik Nuummut tallimanngorneq 24. august apuunneqarsinnaassapput, sinnerilu arfininngorpat apuunneqarsinnaassallutik, taama Air Greenland nittartakkamini allappoq.

Timmisartorsuaq kinguaattoortoq allani aamma atorneqartussaasimavoq taamaattumillu nunatsinnut uteqqeriaannaanani. Air Greenland misissuisimagaluarput timmisartuutileqatigiit allat aqqutigalugit timmisartorsuarmik attartugassarsiorluni - tamannali aamma iluatsissimanngilaq.

– Narsarsuarmi sila ajussanngippat sisamanngornermi Air Greenland Dash-7-it atorlugit ilaasunik Kangerlussualiartitsillunilu Nuummukartitsissaaq, tassanngaanniit Københavnimut ingerlaqqikkumaartussanik. Maannakkorpiaq ilaasussat nuunniarneqarput tallimanngornermi Kangerlussuakkoorlutik Københavniliarsinnaanngorlugit. Aammattaaq Air Icelandip Narsarsuarmiit Reykjavikkimut tallimanngornermi 24. august timmisartuussiffissaa ilaasunik immerneqassaaq. Ilaasut taakkua Reykjavikkimiit Københavnimut ingerlateqqinneqassapput, taama Air Greenland nalunaarpoq.