Naalakkersuisut: Akisussaassuseqarluta angallannermut politikki ingerlapparput

Naalakkersuisut Demokratit uparuaaneranut akissuteqarput

Demokraatit piffissami kingullermi Naalakkersuisut angallannermut politikkiat isornartorsiortarpaat.

Naalakkersuisut tusagassiutinut allapput: – Inatsisartut Naalakkersuisut pisussaaffilersimavaat angallannermi aningaasartuutissat tamarmiusut pingajoraarterutaat sipaarneqassasut – taannalu ukiumut 97 mio. kr. missiliorlugit annertussuseqarpoq. Taamalu annertutigisumik sipaaruteqarnissaq atuisunit ataasiakkaanit malugineqanngitsoornavianngilaq.

– Pingaartuuvoq, aningaasaliisussat ingerlatsinerillu nutaat angallannermiittut akisussaassuseqarluni aningaasanullu naammattusaaraluni aalajangerneqartassasut. Taamaattumik aningaasaliissutissat tamarmik nalilersorluaqqissaarneqartarput, akisoorsuarnik kinguneqarsinnaasunik aalajangiipallakkumanata.

Naalakkersuisut aamma allapput Qaarsuni Qaanaamilu mittarfiit eqqarsaatigalugit ataavartumik nalilersorneqartuartut.

– Aaamma atassuteqaateqarneq tamaat eqqarsaatigalugu sumi inissisimatinneqassanersut. Pingaartuuvoq eqqaamassallugu mittarfiup heliportilluunniit ataatsit eqqartornerinnaatigut pissusiviusut eqqortut saqqummersinneqarsinnaanersut uppernarsaatissaqanngimmat. Tamarmik - sapanngatut allunaasami nuiorakkatut - ataqatigiissinneqartariaqarput.

Kangerlussuaq

– Kangerlussuarmi atortorisat eqqarsaatigalugit ukioq manna malunnaateqavissumik pitsanngorsaasoqarpoq. Ilaatigut tikittut iserfigeqqaartagaat pitsanngorsarneqarput, misissuutit ilaneqarput, taamaalilluni nunanut allanut aallartussat sillimaniarnermut tunngatillugu misissorneqartarneri pilertornerusumik eqaannerusumillu ingerlanneqarsinnaanngorlugit.

– Pingaartuuvoq eqqaamassallugu, aningaasaliissutit tamarmik – aamma Kangerlussuarmi pitsanngorsaanerit – tamaasa ataqatigiissillugit naliliiffigisariaqarmata, imaaginnanngitsoq ullormut akunnermi marlussunni sap.ak. ulluni pingasuni utaqqisoqartariaqartarmat. Tunngaviusariaqarpoq atortut pigeriikkatta atorluarneqarnerunissaat, allineqarnissaallu tamatigut pisariaqarneq ajorpoq.

Kujataa

– Naalakakersuisut suleqatigiissitaliorsimapput Kujataani kommuunit pingasut Namminersornerullutik Oqartussallu peqataaffigisaannik. Suleqatigiissitat nalunaarusiartik innersuussutitalik nunap immikkoortuanut tunngasoq naammassilerpaat.

Powered by Labrador CMS