Ariel ikiorneqalerpoq

7-inik ukiulik Ariel Hegelund, ukioq Sisimiuni toqutsinikkut anaanaaruttoq, Qaqortup Kommuniata kiisami ikiornialerpaa.

Ariel Hegelund ikiorniarlugu Qaqortup Kommuniata kiisami iliuuseqarpoq.

Angutaata arnaatalu ilaqutaasa kommunimut arlaleriarlutik saaffiginnittarnerigalui kinguneqartarsimanngillat, aatsaalli Sermitsiap sapaatit akunerata siuliani pisimasoq sammilermagu iluuseqartoqalerpoq.

Ariel Hegelund angutaalu Martin Jakobsen maanna neqeroorfigineqarput kommunip atorfeqartitaanik psykologimik oqaloqateqartarnissamik, oqaloqatigiittarnerillu sap.akunnermi matumani aallartissapput.

- Qujamasoqaanga nuannaarlungalu paniga kiisami misigisani tupannartut pillugit tarnimigut oqilisaaffigineqarsinnaalermat, Martin Jakobsen oqarpoq.

Qaqortup borgmesteria Simon Simonsen (S) ajuusaarpoq kommunip annilaarnartunik pisoqartillugu ikiuigasuartartoqarnera Ariel Hegelundimut tunngatillugu iluatsissimanngimmat.

- Sulinngiffeqartut utikaariarpata paasiniassavara sunarpiaq pisuulluni iluatsinngitsoortoqarsimanersoq, upalungaarsimasuutitaqarnerpullu allanngortittariaqassanersoq siunissami taama pisoqqinnginnissaa isumannaarniarlugu, Simon Simonsen ajuusaarluni oqarpoq.

Sermitsiaq atuaruk...

Powered by Labrador CMS