Qilalugartassat piariilerput
Qilalugartassat juulip aallaqqaataani piareereersimanissaannik aalajangersgaqanngitsoq, aalisarnermut piniarnermullu pisortaqarfik erseqqissaavoq.
Uummannami piniartut qilalugarniarniarlutik utaqqikatapput.
Partiimi pilersinenqaqqammersumi, Aalisartut Piniartullu Partiianni siulittaasup tullia Pavia Nielsen, Uummannameersoq, ippassigami aalisarnermut piniarnermullu pisortaqarfimmik isornartorsiuivoq oqarluni 1. juli nallertinnagu qilalugartassat aalajangersarneqarnissaanik aalajangersakkat unioqqutinneqartut, Inatsisartullu Ombudsmandiat akulerunneqartariaqartoq.
Tamannali pisariqanngitsoq aalisarnermut piniarnermullu pisortaqarfimmit ilisimatitsissutigineqarpoq.
- Qilalukkanik qaqortanik qernertanillu illersuineq pillugu nalunaarummi aalajangersagaq pisassiissutinik inaarutaasumik agguaanissamut aalajangersimasumik killiliiffiunngilaq, taamaallaalli ukiumik pisassiiffiusumik tassa 1. julimiit 30. junimut, ullut taaneqartut ilanngullugit taaguiffiulluni, allaffimmi påisortaq Lars Geråe oqarpoq.
Ilisimatitsissutigaa ukioq manna qilalukkanik qaqortanik qernertanillu pisassiissuteqarnissamik aalajangersaaneq pillugu naalakkersuisut 20. juni akuersisimasut, tusarniaanerlu juulip 18-iannut killeqarmat pisassiissutinik inaarutaasumik agguaaneq 20. juli naammassissangatinneqartoq. (Aamma atuaruk: Qilalugartassat naalakkersuisut aalajangersarpaat).
Qaanaami Upernavimmilu piniartut immikkut akuerineqarlutik qilalugarnialereerput.
Aalisarnermut piniarnermullu pisortaqarfiup amma erseqqissaatigaa pisassanik suli akuerisoqannginnera kommuninut kujasinnerusunut sunniuteqanngitsoq, qilalukkat aasaanerani tamaaniinneq ajormata.
- Aammattaaq pisortaqarfimmit malugeqquneqarpoq kommunit kujataaniittut arlallit qanorluunniit pisoqaraluarpat piniarneq ukiami siusinnerusukkut pisinnaajunnaarlugu aalajangersaasimammata, pisortaqarfik erseqqissaavoq.