Juulimaat isikkatik kinisimaassavaat

23. juulimi Juullip inuisa nunarsuarmi tamarmeersut ataatsimeersuartarnerminni ukiunik 50-nngortorsiorlutik nalliuttorsiussapput, tamanna ilaatigut Københavnimi juullip inuisa 150-iusut isikkaminnik kinisimaarillutik nalliuttorsiutigissavaat

Ukioq´manna isikkanik kinisimaarinninnissami Københavnimi Fisketorvet-ip eqqaani umiarsualivimmi juullip inuisa isikkatik kinisimaassavaat. Tamatuma kingorna juullip inui ipiitsunik isigaqarlutik Fisketorvet-imi niuertarfinni Rigshospitalet-imi meeqqanut kræftimik eqqugaasimasunut tunissutissanik katersissapput, taamatut Jyllandsposten allappoq.

Ukioq´manna Ataqqinaammik juullip inua tassaassaaq aliikkusersuisartoq Sebastian Klein, meeqqanut silatorpalaartumik aliikkusersuisarnini kiisalu Red Barnet-imut suliaqartarnini pillugu ataqqiniarneqassaaq. Sebastian Klein Cirkusrevyenip tupersuani ”Galla Julebal”-imi pingasunngornikkut ataqqiniarneqassaaq.

Bakkenimi ullut tamaasa juullerpaluttunik aliikkusersuisoqartassaaq. Friluftsscenenimi ullut tamaasa juullerpaluttunik aliikkusersuisoqartassaaq, tassanilu juullip inui aamma meeqqat ”Eventyrteatret”-imeersut aliikkusersuisassapput. Pingasunngornermilu kalaallit qamutaanni juullip inua peqatigalugu juullimut pilluaqqussutissamik assilisittoqarsinnaavoq.

Powered by Labrador CMS