Naalungiarsunnik peqqissaasut amigaatigineqaqaat
Naalungiarsunnik peqqissaanermi suliassarpassuit naammassineqassappata peqqissaanermi atorfiit amerlanerusut pilersinneqartariaqartut ukiumoortumik nalunaarusiami allassimavoq
Peqqissaaveqarfinnik aqutsiviup naalungiarsunnik peqqissaasarneq pillugu ukiumoortumik nalunaarusiaq siulleq saqqummerseqqammerpaa nalunaarusiamilu nunatsinni naalungiarsunnik peqqissaasut amigaatigineqartorujussuusut oqaatigineqarpoq:
– Nunatsinni naalungiarsunnik peqqissaasut maannakkut amigaatigineqartorujussuupput. Naak naalungiarsunnik peqqissaaneq pingaarnertut naalungiarsunnik peqqissaasunit isumagineqartaraluartoq suliassat ilaat peqqissaasunut, juumuunut, peqqissaasunik ikiortinut assistentinullu suliakkissutigineqarsinnaallutillu suliakkiissutigineqartariaqarput, soorlu nunap immikkoortuini arlalinni taamaattoqareersoq. Sulisut tamakku akornanni taamatut suliaqartunik amigaateqartoqaleraangat inatsisitigut aalajangersakkat naammassineqarnissaannut periarfissaqarneq ajortoq oqaatigineqartariaqarpoq.
– Naalungiarsunnik peqqissaasuni sulisut Innuttaasut peqqissusaannik takorluukkat naammassineqarnissaannut pingaaruteqarput. Meeqqat inuusuttullu inuuniarnerminni atugaat sammineqarnerusariaqarput. Naalungiarsunnik peqqissaanermi suliassarpassuit naammassineqassappata naalungiarsunnik peqqissaanermi atorfiit amerlanerit pilersinneqartariaqarput. Tamanna pissutigalugu Peqqissaavinnik aqutsivimmi siunertarineqarpoq peqqinnissaqarfiup aningaasaqarnerata pitsanngorsarneqarnissaanut suliniartoqartariaqartoq, taamaalilluni naalungiarsunnik peqqissaanermi atorfiit amerlanerusut pilersinneqarsinnaaniassammata.