Digital atorlugu qinnguartaasarneq nuna tamakkerlugu
Ittoqqortoormiit napparsimaviat digital atorlugu qinnguartaatitaaqqammerpoq, taamalu Kalaallit Nunaata tamakkerluni digital atorlugu qinnguartaavinngornera piviusunngorpoq.
Maannakkut atortorissaarut nunatsinni napparsimavinni peqqinnissakkullu qitiusuni tamani pigineqalerpoq, naatsorsuutigineqarluni napparsimasunut peqqinnermillu sulisuusunut iluaqutaassasoq.
Digital atorlugu tarrarsuisarnerup pitsaaqutaasa annerpaat ilagaat assilisat akoorutissat atorlugit ersersarnagit allakkatigut naliligassatut nassiunneqarsinnaalermata. Digital atorlugu tarrarsuinermi assilisat qarasaasiatigut Kalaallit Nunaanni avataanilu immikkut ilisimasalinnut naliligassatut nassiunneqarsinnaapput. Tamanna nunatsinni i pitsaaqutaalluinnarpoq, tassami Dronning Ingrids Hospital kisimi qinnguartaanermut immikkut ilisimasalinnik atorfeqartitaqarmat.
Digital atorlugu qinnguartaanikkut napparsimasut immikkut ilisimasalimmit nalilerneqarsinnaalerput nunatsinni sumiluunniit najugaqaraluarunik. Tamatumuunakkut napparsimasut nappaataat sukkanerusumik suussusersineqartalissaaq sukkanerusumillu suliarineqartarlutik.
Peqqinnissaqarfimmi sulisuusunut digitalip atorneqalernerata ilaatigut kinguneraa suleriaatsip oqinnerulerlunilu eqaannerulernera aamma immikkut ilisimasalinnik sukkasuumik isumasiuisinnaaneq. Tamatuma peqatigisaanik napparsimaviit napparsimasup taassumarpiaap digitali atorlugu assilineqarneri tamaasa pisinnaalerpaat. Taamaalilluni assilisat imminnut sanilliunneqarsinnaalerput tamatumuunakkullu suliarinninneq pitsaanerulerluni.