Uummannarmiut illoqarfimmioqatertik nalliuttorsiortigaat

Politikeri juumoorlu Elisabeth Johansen Uummannameersoq ullumikkut 100-nik ukioqalissagaluarpoq

1. aggusti 1907-imi Elisabeth Johansen, Elisibannguaq, inunngorpoq. Ulloq Elisibannguup inunngorfiani Uummanni nal. 13.00 ilaatigut Elisibannguup ilerranut kransiliinermik, titartaanermik unammisitsinermik Timersortarfissuarmilu aaqqissuinermik, tassani nereqatigiittoqarlunilu aliikkusersuisoqarpoq, malunnartinniarneqarpoq. Ulloq qitinnermik naggaserneqassaaq, tassani Elisibannguup qitornai, Lars-Emil Johansenimit siuttuuffigineqartut taassumalu nipilersortartui Soul Mates-it, polkanik nipilersortartut, aliikkusersuissapput, taamatut KNR oqaluttuarpoq.

Elisabeth Johansen 1959-imi Landsrådimut qinigassanngortippoq Nunallu immikkoortuani Uummannami arnanik siullersaallu Landsrådimut qinigaavoq. Dansk Kvindepolitisk Leksikonimi allaaserineqarpoq, politikimut qinigaasimasut tamarmik Elisibannguup politikikkut pikkorissusia, nikallujuissusia sapiissusialu ataqqigaat.

1977-imi Siumut pilersinneqarmat partimut ilaasortanngorpoq 1993-imilu toqunissani tikillugu tassani ilaasortaalluni.

Powered by Labrador CMS