Sanami pujortartoqaqqusiunnaalerpoq

Dronning Ingridip napparsimmavissuani uninngasut ukiortaamiit pujortaqqusaajunnaassapput

Ukiortaamiit uninngasut pujortartarfii kingulliit matuneqassapput, taamaalilluni napparsimmavissuup pujortartarfiunnginissaanik anguniakkat anguneqassapput, napparsimmavissuarmut pisortaq Jens Møller Jensen oqarpoq.

Taassuma paasissutissiissutigaa Dronning Ingridip Napparsimmavissuani (Sanami) pujortaqqusiunnaarnissaq 2005-imili aallartinneqartoq, tamatumani sumiiffinni tamangajanni pujortartoqaqqusaajunaatoqarpoq. Januaarip ulluisa aallaqqaataanni pujortartarfiit tamakku matuneqassapput tamatumalu kingorna napparsimmavissuup silataani aneerasaartarfinni taamaallaat pujortartoqarsinnaalissaaq.

Ukiortaamiit napparsimmavissuaq pujortarfigeqqusaajunnaartussasoq maannangaaq uninngasunut paasititsiuniutigissavarput. Pujortaqqusiunnaarnissaq ilaatigut napparsimmavissuarmi nivinngakkatigut uninngasunullu paasititsiniutitigut ingerlanneqassasoq Jens Møller Jensen oqarpoq.