Nuummi GU-p pisortaa naggataarpoq
Margit Motzfeldt ilinniartunut naggataamik oqalugiarpoq.
Nuummi Qeqqani Ilinniarnertuunngorniarfiup pisortaa, Margit Motzfeldt, arfininngormat soraarummeernermi ilinniartunut naggataamik oqalugiarpoq. 62-inik ukiulik Margit Motzfeldt ukiut qulingiluat sinnerlugit pisortaareerluni aappaagu marsip naaneraniit soraarninngorluni taamatissaaq.
Soraarummeernermi pisortap Motzfeldtip atuakkiortup qanganngoreersullu Hans Lyngep allakkiaa "Aalisaat takinerpaaq akisunersaavoq" issuaaffigaa. Tassani Lynge imatut allappoq "ilinniagaqarluni angusaqarusukkaanni taava ilaanneeriarluni nuannaarniutit tunulliunneqartariaqartarput aammalu kakikkartitsilerluni atuakatalluniluunniit ilumit oqaaseq unitsitseqqusisoq tusaanngitsuusaarneqartariaqartarpoq.”
– Oqaatsit taakku ukiut 70-it sinnerlugit matuma siorna oqaatigineqarsimasut uppernanngingajappoq kisianni tassa 1934-mi oqaatigineqarput, Margit Motzfeldt oqarpoq, nangilluni ilinniartut arlallit oqaatsit taakku tusaanngitsuusaarsimanngikkaat.
– Sooruna ullumikkut taama ikitsigaasi aamma sooruna ilarpassuassi fagini tamani misilitsitsittariaqartut. Aap, tassa atuarnersi paarinnginnassiuk, Margit Motzfeldt oqarpoq. Margit Motzfeldtip oqalugiarnermini aamma politikerit tikippai:
– Naak piumassuseqaraluarluni ilinniarnertuunngorniarfimmi ilinniartitsisut ilinniagartuut akornanni akissarsiakitsuararsuupput. Tamanna upernaaq akissarsiat pillugit isumaqatigiissut itigartitsissutigineqarmat malugaarput. Atorfiuvorli Ilisimatusarfimmi naammassisut kisiisa sulisoralugit naammassineqarsinnaanngitsoq, ilisimatusarfinni allani naammassisimasunik aamma ilinniartitsisoqartariaqarpugut, Margit Motzfeldt erseqqissaavoq. Margit Motzfeldtip aamma oqaatigaa ukiuni aggersuni ilinniarnertuunngorniarfik tuluttut ilinniartitsisussanik amigaateqartorujussuusussaasoq.
Soraarummeernermi assit uani takukkit.