Arabiamiusut Nunarput pillugu paasititsiniaaneq

Århusimi illoqarfiup ilaani Gellerupimi kalaallit ataqqineqarnerulerniassammata Kalaallit Illuutaat paasititsiniaavoq.

Gellerupimi Atuakkanik atorniartarfimmi Nunarput pillugu lysbillediat atorlugit ullut tamaasa takutitsisoqartarpoq – Arabiamiusut aallagartalersorlugit.

Paasititsiniaanermut tunuliaqutaasoq oqaluttuaavoq nuannerpallaanngitsoq, tassami kalaallit inuttut ajornartorsiuteqartut ukioq amerlasoorpassuariarlugit nakuuserfigineqartarlutillu asissorneqartarput. Ilaatigullu JP Århusimi eqqartorneqareernerisigut Kalaallit Illuutaat isumasioqatigiissitsivoq isumasioqatigiinnermilu Gellerupimi kalaallit ataqqineqarnerulerniassammata paasititsiniaasoqassasoq aalajangerneqarpoq.

- ”Gang i Gellerup”-imik festivalertoqarnerani Kalaallit Nunaat pillugu lysbillediat atorlugit isiginnaartitsisarpugut, Arabiamiusut allagartalersorlugit. Aamma oqalugiartitsisimavugut tassanilu assit Kalaallit Nunaanneersut skærmerujussuakkut takutinneqarput tassanilu Kalaallit Nunaanni pinngortitaq, kulturi inuiaqatigiillu oqaluttuaraavut. Amerlanerpaat Kalaallit Nunaannik ilisimasakitsuararsuusut malunnarpoq aammalu assersuutigalugu kalaallit danskisut innuttaassuseqartut amerlasoorujussuit naluaat, Kalaallit Illutaanni pisortaq, Sven Kolte, Jyllands-Postenimut oqarpoq.

Kalaallit Illuutaata ukiamut Gellerupimi paasititsiniaaneq nangeqqissavaa taamanikkullu ilaatigut atuarfiit peqatigiiffiillu pulaarneqartassapput.

Powered by Labrador CMS