Fritidshjemimi tuberkulosi
Nuummi fritidshjemimi Qajaasani sulisoq tuberkuloseqartoq paasineqarpoq. Tuniluunnissaa ernumanarpallaanngilaq, peqqinnissaqarfimmik nakkutilliisoq oqarpoq.
Ernumasoqartariaqangilaq, peqqinnissaqarfimmik nakkutilliisoq, Flemming Stenz eqqissisaavoq:
– Tuberkulosip tuniluussinnaanera annikitsuinnaavoq taamaattumillu ernumasoqartariaqanngilaq, Flemming Stenz, sermitsiaq.gl-imut oqarpoq.
Peqqinnissaqarfimmik nakkutilliisup angajoqqaat Qajaasani meeraatillit meeqqat peqqissaasumit tuberkulosimik misissuissartumit qaqugu misissorneqarsinnaaneri pillugit ilisimatinneqarnissartik utaqqimaassagaat kaammattorpai.
Nuup Kommuneani atuarfinnut direktør, Anne Larsen, naapertorlugu fritidshjemip Qajaasat aammalu meeqqanut kultureqarnermullu ingerlatsivik peqqinnissaqarfimmik nakkutilliisoq qanimut suleqatigaat.
– Kikkut Qajaasanut attuumassuteqarsimanersut pillugit paasissutissanik tamanik ikiuuppugut, Anne Larsen oqarpoq.
Taassuma paasissutissiissutigaa, meeqqat fritidshjemimut attuumassuteqarsimasut maannakkullu fritidshjemimiinnartarunnaarsimasut allattorsimaffii peqqinnissaqarfimmik nakkutilliisumut nassiunneqarsimasut. Tamatuma saniatigut peqqinnissaqarfimmik nakkutilliisup fritidshjemimi sulisut sulisuusimallu allattorsimaffii pissavai.
Ataasinngornermi 2/7-07 nal. 11.00, peqqissaasoq tuberkulosimik misissuisartoq Qajaasanukassaaq taamanikkullu meeqqat sulisullu tamarmik misissorneqassapput. Qajaasani meeraateqaraanni meeqqap taassuma taamanikkussamut Qajaasaniinnissaa taamaalillunilu misissortinnissaa pitsaasuussaasoq atuarfinnut pisortaq, Anne Larsen, oqarpoq.