Inissiat 146-ut isaterneqassapput
Nutarterinissaq akisooq pinngitsoorniarlugu Namminersornerullutik Oqartussat Nuup Kommunea 70 mio. koruunit missarpiaannik akilerpaat, taamatut allappoq Nuuk Ugeavis.
Namminersornerullutik Oqartussat julip aallaqqaataani inissiat 222-t Tuujummiittut - Lille Slette - akeqanngilluinnartumik tunniuppaat, tamatumalu saniatigut tunissummut kusanartumut landskarsi 69,9 millioner koruuninik tapisivoq.
Namminersornerullutilli Oqartussat blokkinik 13-inik, A-miit O-mut, kommunimut tunniussaqarnermigut isertukkaminnik siunertaqarput.
Tuujummi - Lille Slette, blokkit 1960-ikkut aallartinneranni sanaartorneqarsimasut ullumikkut nutartigassarujussuupput.
Blokkit A-miit L-imut, katillugit 146-nik inissiartallit, ukialunnguit qaangiuppata isaterneqassapput, imaassinnaavorli Blokkit L, M aamma N, katillugit 76-inik inissiartallit nutarternissaat akilersinnaasoq.
Tuujuup - Lille Stelltep sapaatip akunnerani tulliuttumi kommunimut tunniunneratigut ukiualunnguit qaangiuppata akisuumik nutarterinissaq Namminersornerullutik Oqartussat pinngitsuussavaat.
Kommunilu affarmik tamakkiisumilluunniit isaterisinnaanngilaq - inissanillu untritilinnik marlunnik sanaqqissinnaanani Namminersornerullutik Oqartussaneersut 69,9 millioner koruunit atorlugit.
Kommunimi tunissut assigiinngitsunik marlunnik isumaqarfigineqarpoq.
Gruppip aappaa oqarpoq Nuuk nalissaqanngitsumik periarfissaqalissasoq issittumi illoqarfiit pingaarnersaanni illoqarfiup qeqqani nutaaliaalluinnartumik pilersitsinissaminut.
Gruppip aappaa oqarpoq Namminersornerullutik Oqartussat aningaasatigut akisussaaffitsik kommunimut uppertikkuminartumut ingerlateqqissimagai.
Inissianilu 222-ni najugallit siunissartik pissangallutik utaqqivaat.
Ullumikkut qularnaarfigineqarsinnaanngillat Tuujummi inissianut nutartikkanut nutaanullu uteqqissinnaanissaminnut.
Periarfissarpassuit
Qularutissaanngilarli Tuujuk Nuummut siunissami periarfissarpassuaqartoq.
Piffimmi inissakilliorfimmi illoqarfiup qeqqani nunaminertaq inissisimavoq, illoqarfiulli nutarternissaanut arlalinnik siunnersuuteqartoqareerpoq.
Pisiniarfissuit, paaqqinnittarfiit aammalu utoqqarnut innarluutilinnullu inissiat takorluukkat ilagaat.
Kommunilli toqqarsinnaavaa Tuujuup ilaasa annertunerup annikinnerusulluunniit sanaartortitsisumut namminersortumut tunniunnissaa.
Tamannali namminersortunngorsarneqassappat tamatuma qularnanngitsumik kingunerissavaa najugaqartut amerlaqisut illoqarfiup immikkoortuanut tassunga uternissaminnut akissaqanngitsut.
Imaaratarsinnaavormi Nuuk pisuut najugaqarfigileraat portusoorsuarnik ilulik inissianik millionilikkaanik nammineq piginniffilik, Nuussuaq piitsoqarfinngorluni nalinginnaasunik inissiaqarfilik.