USA-mut billetsit akikitsut
Air Greenland Baltimorep tungaanut billetsinik akikitsunik neqerooruteqarpoq
Air Greenlandip Nunatta USA-llu akornanni timmisartunut aqqummi nutaami timmisartumi inissat inoqanngitsut inuttalersorniarlugit billetsinik akikitsunik neqerooruteqarpoq. Kangerlussuarmiit Baltimoremut uterlugulu 2.496 koruuneqarpoq, akileraarutit, akitsuutit il.il. ilanngullugit. Ataasinngornerit tamaasa Kangerlussuarmiit Baltimoremut uterlugulu timmisartortoqartassaaq sapaatillu akunnerani tassani sisamanngornerit tamaasa piffissami 16. juulimiit 13. aggustip tungaanut taamatut timmisartortoqartassalluni.
Billetsit akikitsut amerlassusaat killeqarput. Tuniniaanermut pisortap, Christian Kjeldsenip billetsit qasserpiaat pineqarnersut oqaatigiumanngilaa, taassumali timmisartunut aqqummi nutaami inissat inoqanngitsut ilaat inuttalersorniarlugit taamatut neqerooruteqarnertik nassuerutigaa.
– Soorunami inissat inoqanngitsut inuttalesorniarsarivavut. Inuit tasamaneereersimallutik uterlutik misigisalikkersaartarnerisigut aqqutip nutaap tuniniarneqarsinnaanera neriuutigaarput, Christian Kjeldsen oqarpoq.
Kangerlussuarmiuunngikkaanni billetsinut neqeroorutaasunut billetsit aappaluttut ilanngunneqarsinnaasut Air Greenlandimit paasissutissiissutigineqarpoq.