Quest ikkarlikkami sukkangaatsiarpoq
Ikkarlittumik takunneqqaartoq Hans-Kristian Broberg isumaqarpoq umiarsuaq arriitsunnguamik ingerlasumik oqaatigineqarsinnaanngitsoq.
Hans-Kristian Broberg Questip (Disko II-p) ikkarlinnera siulliulluni kalerriuppaa, isigianilu naapertorlugit arriitsunnguammik ingerlanerarneqarnera ilumuunnginnerarpaa.
Hans-Kristian Broberg ima oqaluttuarpoq:
– Ullaakkununa pisuttuarneq ajuuillunga kangimut pisuttuarama sissakkut Qiterninnguinik taasakkatsinnut. Nallerlungulu takulerpara kanginni angallassuaq, sunaaffa Quest, naamillu tunusingaarmat ilimasulerpunga iluarunnanngittoq, sunaaffami ikkarlinnialertoq.
Pissangallunga aarimmi pingasoriarluni qanngorpallarujukkami uerlunilu tunummut nappatalaartorsuulluni, allaanngilaq umiatsiaq sikumut qaqisoq. Nueqqaarnerminiit ingerlasukaartorujuungami.
Radioaviisikkununa arrittunnguamik ingerlanerarmassuk, kisianni taamaanngilaq. Ingerlasukaartorujuulluni ikkarlippoq qaqivissuutingisamik. Qipoqqarnik takunngilanga eqqaniittunik, taamaallaat kitaatungingaatsiaaniipput qipoqqaat ilulissat angivallaanngitsut akornanni, angallassuarmiik takusassaanngittut.
Mobilera qimannikuungakku uatsinnut arpapallappunga sianerlungalu politiinut, sunaaffa siulliullunga sianerlunga, Hans-Kristian Broberg allappoq.
Angalatitseqatigiiffiup Albatros Travelip umiarsiuaq attartugaraa, tassanilu pisortaq Søren Rasmussen oqarpoq nammineq ilisimasani naapertorlugit umiarsuaq ikkarlikkami 4-5 knobinik sukkassuseqarsimasoq.