Quest Nuummiippoq

Ilaasartaat maanna Nuummut tikereersimalerpoq, tassani amuneqassalluni sukumiiinerusumik misissorneqassalluni.

Quest tallimanngormat unnukkut Qeqertarsuup eqqaani ikkarlummit kaanngartinneqareerluni maanna Nuummiippoq.

Qeqertarsuup eqqaani ikkarlummit kaanngartereerlugulu ilaasartaat Quest/Disko Nuummukaanneqarpoq tassani amuneqassalluni. Nuup Amutsiviani ingerlatsinermut pisortaq Benny KIelsen naapertorlugu Quest maanna kangerliumanermi Malene-bugtenimiippoq ullullu ingerlanerani amuneqassalluni.

Qeqertarsuup Tunuani ikkarlinnerata kingorna umiarsuup kujammut ingerlanneqarnissaanik Søfartsstyrelsi akuersisimavoq. Taamatut paasissutissiivoq skibsinspektør Hans Fleischer, Søfartsstyrelsimeersoq, Sermitsiaq.gl-imut.

– Umiarsuaq Nuummukarnissaminut akuerineqarsimavoq naalagaa inuttaalu tamaasa issimasoralugit, ilaaasoqaranili, Hans Fleischer oqarpoq.

Taamaasilluni Quest Nuummiissammat qularnanngitsumik tassani aamma immakkut ajutoornermut tunngasunik nassuiaatitsisoqassaaq, Hans Fleischer naliliivoq.

Angalatitseqatigiiffik Albatros naapertorlugu aqqartartut misissuigallarnerini Questip nutaamik ajoqusersimanera paasineqarsimanngilaq. Umiarsuaq Nuummi amuneqassaaq aquanilu ajoqusernera misissorneqassalluni kujaavalu immikkut misissorneqassalluni. Nutaamik ajoqusersimanngippat naatsorsuutigineqarpoq umiarsuaq angalanissaminut akuerineqassasoq nalinginnaasumillu angalaqqilerluni, taamaasilluni ilaasussat tulliit tullianik tallimanngorpat Kangerlussuarmut aanissaat angumerisinnaallugu, Albatros quppernermini nittartakkami paasissutissiivoq.

Powered by Labrador CMS