Utoqqalinersiat qaffapput

Utoqqalinersianik iluarsaasseqqinneq juulip aallaqqaataaniit atuutilerpoq, tamannalu Nuup Kommuneani utoqqalinersisartunut 540-nut malunnartumik sunniuteqassaaq.

Utoqqalinersiat nalinginnaasumik iluarsaateqqinneqarnerisa saniatigut aamma utoqqalinersisartut akileraarutinut ilanngaanneqarnissap tungaanut amerlanerusunik saniatigut isertitaqartarsinnaalissapput.

Ukiuni makkunani ukiut inuuffiusartut agguaqatigiissillugu qaffakkiartorlutillu peqqissuseq pitsanngoriartormat utoqqalinersisartut ilarpassui piffissap ilaatigut suliffeqqartarnissaminnut nukissaqartalerput.

Utoqqalinersisartullu suli suliffeqartunik aappallit, aapparmik isertertitaasa sunniuteqarnissaasa tungaanut, utoqqalinersiamik tunngaviiga 50 procentiisa pinngitsooratik pisarnissaat qularnaarsinnaalerpaat.

Apparmik suli suliffeqarnerisigut utoqqalinersiassaarutiusartarnertik inuit inuunertik tamakkerlugu suliffeqareersimallutik utoqqalillutik tunuartut ukiuni arlalinngortuni sakkortuumik isornartorsiortarsimavaat.

Sianigisassat

Utoqqalinersiat iluarsaateqqinnerisigut tapisiarineqartartut assigiinngitsut pingasut aamma qaffapput: Meeqqanut tapisiat, pisariaqartitsinermut tapisiat inummullu tapisiat.

– Pisariaqartitsinermut tapisiat nutaajupput, tassuunalu kommunit periarfissinneqarput utoqqalinersisartup aningaasartuutissat aalajangersimasut akilereernerisigut nersassarsiutissanik, atisassarsiutissanik kaasarfimmiussanillu tapiiffigisinnaanissaanut, Jess Storm Madsen Ilaqutariinnut Pisortaqarfimmeersoq oqarpoq.

Tassami utoqqalinersianik iluarsaaqqinnermi aamma sianigisassaqarpoq.

Utoqqalinersiat qaffannerat aamma tapiissutinut isertitat najoqqutaralugit tunniunneqartartunut, ilaatigut illoqarnermut tapiissitinut, sunniuteqassaaq.

Taamaattumik utoqqalinersiallit ilaasa arlaatigut iluaqutissarsiatik arlaatigut annaaratarsinnaavaat.

Nuup Kommuneani isumaginninnermut ataatsimiititaliap siulittaasua Ane Egede Mathæussen, Siumut, oqarpoq, utoqqalinersiat qaffannerisa kinguneqarnerluutigisinnaasaat ataatsimiititaliap alaatsinaakkai.

Isumaginninnermut ataatsimiititaliap aasaanerani feriarnerup kingorna utoqqalinersiat iluarsaateqqinneqarnerisa kingorna utoqqalinersuisartut atugariligaat tamaasa misissorluassavaat.

Nuuk Ugeavisimi sinnera atuaruk....