Isorliunerusut timmisartukkut iluarsiivigineqarput
Upernaviup, Uummannap aamma Nanortallip angallavigineqarnerisa 5. juli 2007-mi atuutilersumik immikkut tapiiffigineqarnissaannik Naalakkersuisut qinnuteqaataat Inatsisartut aningaasaqarnermut ataatsimiititaliaasa aalajangeqqammerpaat.
Tapiissutit malitsigisaannik piffissami 5. julimiit 28. augustimut Ilulissat Upernaviullu akornanni Dash-7-imik sapaatip akunneranut timmisartuussisarnerup ataatsimik amerlinissaata neqerootugineqarsinnaalernera. Timmisartuussisarnerup ataatsimik ilassutaani tassani inissat amerlanersaat Takuss atorlugu neqeroorutigineqarsinnaapput, billetsi uteriassutissaq katillugu 2162 kruuninik akeqassalluni, attaveqarnermut pisortaqarfik nalunaarpoq.
Uummannamiit Qaarsumut qulimiguulimmut siumuinnaq angalaneq akitsuutit ilanngullugit 300 kruuninut akikillineqassaaq. Bilitsimut akigitinneqartoq 2007-mi ukioq naallugu atuutissaaq.
Angallavinni Nanortalimmiit Qaqortumut Nanortalimmiillu Narsarsuarmut bilitsit akii appartinneqassapput. Qaqortumut bilitsi siumuinnaq siornatigut 906 kruuneqarsimagaluartoq akitsuutit ilanngutereerlugit 546 kruuneqalissaaq, Narsarsuarmullu bilitsi siornatigut 1266 kruuneqarsimasoq siunissami akitsuutit ilanngutereerlugit 1101 kruuneqalissalluni. Ukiup 2007-ip sinnerani akit atuutiinnassapput.
–Nuannaarutigaara angallannerup aaqqissuussaanera pitsaanerulermat taamaalillutik innuttaasut amerlanerujussuit angalanissamut periarfissinneqarmata, tassa billetsit akii appartingaatsiarneqarmata, Ineqarnermut, Attaveqarnermut aamma Aatsitassanut Ikummatissanullu Naalakkersuisoq Kim Kielsen oqarpoq.